بی این ایم نا چئیرمین ڈاکٹر نسیم بلوچ کوئٹہ لک پاس آن زوراکی ئٹ بیگواہ کننگوک آ زالبول آتا بابت ئٹ چاگڑدی میڈیا ایکس آ نوشتہ کرینے کہ پاکستان ہخس سال ءِ بلوچ زالبول آتے دزگیر کننگ، خاہوت آتے خلیفنگ و بے توار کننگ نا کوشست کننگ ءِ۔ ہنوکا اِرا سال آن دا زوراکی نا پالیسی تیز کننگانے۔
او بیان ئٹی پارے کہ داسا بی این پی نا رہشون جمعہ خان بلوچ نا خاہوت نا مُسہ زالبول رافیعہ، تانیہ و جویریہ ئے پاکستانی فوج زوراکی ئٹ بیگواہ کرینے۔ اوفتا خاہوت ئے اینو اسکان دا پاننگ متنے کہ اوفک ارانگ ءُ و اوفتون انت مننگ ءِ۔
ڈاکٹر نسیم بلوچ پارینے کہ جہان ہرا وخت اسکان بے توار مرسا ندارہ کرو؟ بلوچ لُمہ، مسڑ، ایڑک دزگیر مرسا ڈھکوک ٹارچر سیل آتیٹی دننگ مننگ ءُ۔ ہندا سوب آن آجوئی المی ءِ۔ بلوچ راج نہ غلامی ٹی ایمن مرو نہ اونا شرف رکھینگو۔
