نوشکی آن درو پاکستانی فوج غریب آباد و ہیب کھیب ئٹ خلک آ تیٹی چھاپہ خلِسہ اُراتے پٹ ءَ پول کرسہ کیہی بندغ آتے زوراکی ئٹ بیگواہ کرینے۔
حوال تا رد ئٹ زوراکی ئٹ بیگواہ کننگوک آ بندغ آتیٹی ورنا و کماش آک ہم اوار ءِ۔ دا بندغ آتیٹی گیشتر ہمو بندغ آک مسنو ہرا درو ویگ ئنا زوراکی ئٹ بیگواہ کننگانو کہ مسجد آ نماز آ بسنو۔ دا بندغ آتیٹی تنیا مسجد نا امام یلہ کننگانے ایلوفتے برمتہ کرسا تینتون درینے۔
ہندا وخت آ فوج اُراتے پٹ ءَ پول نا نیام ئٹی ایلو بندغ آتے غریب آباد نا قبرستان آ مُچ کرینے و کُل بندغ آتے بس و ٹرک آتیٹی سوار کرسا تینتون درینے۔
ہندی بندغ آتا پاننگ ءِ کہ دزگیر کننگوک آ بندغ آتا کچ سخت زیات ءِ، اوفک خواست کرینو کہ کُل بندغ آتے زوت آجو کننگ مرے۔
