چارَمیکو بشخ
نوشتہ کار: خلیل بلوچ
مٹ و بدل: راسکوہ بلوچ
اِرٹمیکو دیگر نا او تنیا بسس، ای پسٹل ئے ملنگ و تفنگ ئے ہیل تِسُوٹ تہ۔ اسہ سُم ئس شاغاٹ و تِسوٹ تہ، ڈیو نا بوتل ئس نشانہ کِن تِخاٹ۔ او پوزیشن ہلک و فائر کرے بوتل ہمو جاگہ غا تِخوک اَس، ولے سُم ہچ چاننگ متو کہ ہرا نیمہ غا ہِنا و نئے کہ دنز ئس کرے، اونا دروشم پین وڑ مس۔ ای ہُراٹ کہ داسہ شوخی و مسخرہ آن تَمِّک، گڑا ای ایلو شش اِننگا سُم تے میگزین ئٹی شاغاٹ فوکس و دُو ئنا لڑزنگ نا ورزش ئس پاریٹ تہ و پسٹل ئے اونا دو ٹی تِسوٹ و پاریٹ، ہرف دا راجی مڈی نا انامت ءِ، جوانی ئٹ رکھس تہ۔ نا دُو ئنا لڑزنگ چُھٹا گڑا کم کم آ ہندا سم تے نشانہ آن خَلیس، ایلو وخت اِسکان ای نیکن پین سم وڑ کروٹ۔ او پسٹل ئے ہرفے و پارے:
”جان آن زیات رکھوٹ تہ۔”
منہ وخت آن پد ای نیٹورک ئسے آ بسوٹ و اوڑتون احوال کریٹ، ہندن حال احوال ئٹی پارے کہ ” کنا وڑک ہند ئٹی خراب ءُ۔ ریاست ئے کنا زی آ شک ءِ، اندازہ ہندادے کہ کنے دیک۔”
بھاز آ بہانہ تے مون آ تِخسہ پارے کہ کنے دو ہلبو ای داسہ شار ئٹ زُنڈنگ کپرہ، گڑا ای اودے دلاسہ تِسوٹ و نیٹورک آن ہناٹ۔ بارگ جان تون مشورہ کریٹ، کنے و بارگ جان ئے ہُرے آن خلیس اس اُست ئٹ توریسُن کہ زوراک آ لشکر اودے دَپ۔ میرل ایہن ہند ئکن ہِننگ ئٹی اَس، نن میرل ئے پارین کہ ہموکان اودے دو ہڷ و ہتہ۔ میرل ورندی تِس کہ ”ای تینٹ خنِوہ تہ و وڑ آتے تہ ہریوہ۔”
میرل خلق ئکن پیشتما، ای نیٹورک کِن۔ ای اودے پاریٹ تینے تیار کر، تینکن چوٹ ہلّک، میرل بننگ ءِ نے ہتیک۔ گڑا بھاز خوش مس، انتئے کہ مش آ بننگ اَس۔ ہر وخت کہ موقع ئس رسینگوس تہ راسکوہ نا مش تا تنیا اُست نا زنگ آتے سِلاکہ۔ ہندُنکہ کلگ نا تنک آن ہیمون مروس پاریکہ جنت ئٹ سر مسُن اُن، ہنداخہ تاہیر ہرفیکہ تہ، ولے داسہ اونا گوربام رنگ ءُ مزل شور نا مش اَسک۔
منہ دے آن پد میرل وری بس ولے او تُد الو، نن سوج کرین امر مس رگو تُد اَف، خیر ءِ؟
میرل وراندی تِس کہ ” دا رگو جُگاڑ ئسے، دادے ہچو ویل اف۔ تینتون تینٹ تیار ئے مش ئکِن، کس اس اونا زی آ شک اف۔ الیتہ ہموڑے کاریم کیک، ایہن ناجوڑ ءِ۔ دے چائک داڑے تب تہ امر مرے۔”
اسہ وار ئس پدا ہموڑے رہینگا، ولے دا وار نا ہتنگ تہ سخت کبین تما۔ دہ دے گدرینگتوسک کہ احوال بس رگو بیگواہ کننگانے۔
برجاء ءِ۔۔۔۔۔
