بلوچستان نا بھلا شار کوئٹہ آن خُڑک ضلع ہرنائی نا مشی ہند شعبان آن چار بندغ نا جون آک خننگانو، کالخواہ نا رد ئٹ چار انگا بندغ آتے سلاہ بند بندغ آک برمتہ کننگ آن پد سُمکاری کرسا خلکنو۔
پولیس جون تے دوئی کرسا کوئٹہ نا کمبائنڈ ملٹری اسپتال آ درینے ہراڑے اوفتا چائنداری ایئرپورٹ سکیورٹی فوج ئنا انسپکٹر زبیر احمد شاہوانی، کوئٹہ نا علاقہ شیخ ماندہ نا ہندی سی ٹی ڈی نا مُسکوہی کارندہ سید خلیل الرحمن، زیارت نا ہندی فوج ئنا ریٹائرڈ حوالدار محمد صادق پانیزئی و زیارت پولیس کانسٹیبل فرید اللہ کاکڑ نا پن تیٹ مسنے۔
پولیس نا رد ئٹ انسپکٹر زبیر احمد شاہوانی کوئٹہ جناح ٹاؤن نا ہندی ئس ءِ و اونا برمتہ نا مقدمہ ئے اونا باوہ جناح ٹاؤن پولیس اسٹیشن ئٹی 24 جون آ نوشتہ کرسا پاریسس کہ اونا مار اسلام آباد ائیرپورٹ آ ڈیوٹی کریکہ و اسہ تو ئنا موکل ہلِسہ کوئٹہ آ بسس ہرادے 21 جون آ برمتہ کننگانے۔
پولیس نا رد ئٹ کانسٹیبل فرید اللہ کاکڑ زیارت نا ہندی ئس ءِ و پولیس اسٹیشن مانگی ٹی ڈیوٹی کریکہ ہرادے پولیس اسٹیشن آن اُراغا بننگ نا وخت آ برمتہ کننگاسس و محمد صادق پانیزئی ہم زیارت نا ہندی ئس ءِ، اودے ہم نادُرست بندغ آک برمتہ کریسُر۔
