بلیدہ : پاکستانی لشکر نا دُو آن زوراکی ئٹ بیگواہ مروکا اسماعیل و حفیظ نا خاوت آک تینا زوراکی ئٹ بیگواہ مروکا بندغ آتا آجوئی کن توار چست کننگ نا خواست ئے کریر ۔
او پاریر کہ 25 جنوری 2024 آ شام ئنا سئے بجہ آ بٹ بلیدہ ڈور آ پاکستانی لشکر و ڈیتھ اسکواڈ نا کارندہ آک ننا اُراغہ جلہو کرِسا لُمّہ و چُناتے بے شرف کرِیر ۔ اُرانا گڑا تے پرغار ۔ اسماعیل ولد شاہداد و حفیظ ولد عبدالحمید ئے دزگیر کرِسا بیگواہ کریر ہرافک انگہ بیگواہ ءُ ۔
خاوت آتا رد ئٹ لشکر نا جلہو کننگ نا نیام ئٹ اُرانا کُل بندغ آتا موبائل آتے پُلار، لُمّہ و ایڑ تے بد و رد کرینو ۔ اُرانا کُل بندغ آتے تشدد نا گواچی کرینو ۔
او پاریر کہ داکان مُست ننا خاوت ئے پاکستانی لشکر زوراکی نا گواچی کرینے ، مُست کیہی ورناتے دزگیر کرِسا تشدُد کننگ آن پد آجو کننگانے ۔
خاوت آک بلوچ راج و بندغی حق آتا ادارہ تیان توار بُرز نا خواست کریر و پاریر کہ اسماعیل و حفیظ نا آجوئی کن توار چِست کرسا تینا کرِدئے ادا کبو ۔
