بلوچستان نا بھلا شار کوئٹہ ٹی پُر ایمن برانز آ پاکستانی فوج کریک ڈاؤن کرسہ نادیہ بلوچ تون اوار کیہی برانزی تے دزگیر کرے۔
دا برانز بی وائی سی نا رہشون ڈاکٹر ماہ رنگ و شاہ جی بلوچ ئے عمر قید نا سزا تننگ نا برخلاف مننگ اس و کریک ڈاؤن آن پد ہم برانز برجاء ءِ۔
خاہوت آتا رد ئٹ برانز آن مُست پولیس و ایلو فوجی کارندہ آک بھلو کچ ئسیٹی برانز جاگہ غا سلوک اسُر، ہرا وخت برانز بناء مس، فوج اوفتے بشخ کننگ نا کوشست کرے، ہندا وخت ڈاکٹر ماہ رنگ بلوچ نا چُنکا ایڑ ئتون اوار کیہی برانزی تے دزگیر کننگا۔
پدا برانزیک دزگیری تا برخلاف بشیر چوک ئے بند کریر و برانز ئے دھرنا ٹی بدل کریر۔ دا وخت بشیر چوک آ دھرنا برجاء ءِ۔برانزی تا پاننگ ءِ کہ ہرا وخت اسکان دزگیر کننگوک آ برانزی تے یلہ کتنو برانز برجاء مرو۔
اوفک کوئٹہ نا اُلس، بندغی حق آتا تنظیم، وکیل، سیاسی باسک و سول سوسائٹی آن خواست کرینو کہ دھرنا ٹی اوار مرسا انصاف، بنیاتی حق و قانون نا بالادستی کن توار بڑز کیر۔
