بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کننگوکءُ بیان ئسیٹی پارے کہ سرمچار آک 22 جون 2026 آ تنظیم نا ڈھکوک ونگ ئنا اطلاع آ بارکھان نا ہند تکھڑا ونگہ ٹک نا سند آ اسہ بھاز سوگو و مربوط کارروائی ئس کرسہ قوضہ کروک پاکستانی فوج و ڈی سی بارکھان نا اوار انگا کاروان ئے سنگر ہلوک جلہو ئٹی ٹک کریر۔
ترجمان پارے کہ دشمن نا ہِن ءُ بر نا ڈھکوک آ معلومات ملننگ تون سرمچار آتا دستہ ہمو جاگہ آ سر مننگ تون پوزیشن ہلکُر۔ ہندن کہ دشمن نا 8 لاری و 20 موٹر سائیکل آتون اوار مُرغن آ کاروان سرمچار آتا نشانہ آ بَس، مست آن سنگر ہلوک سرمچار آتا تیار دستہ غاک چارمہ کنڈ آن دشمن آ خودکار سلاہ تے ئٹ جلہو کریر۔ جلہو نا زد ئٹی بروک ڈی ایس پی بارکھان نا لاری ناکارہ مس۔ سرمچار آک مون پہ مون و مچ آن زیات زیمی جلہو کننگ تون فرنٹ لائن ئٹ ساڑی فرنٹیئر کور (ایف سی) نا لاری تے ٹک کریر ہرانا سوب آن دشمن نا 6 فوجی کارندہ جاگہ غا کھسکر و بھاز آ ٹپی مسر۔
میجر گہرام بلوچ مُستی پارے کہ کارروائی نا وخت سرمچار آک پولیس فورس نا ہندی بلوچ کارندہ غاتے سخت وارننگ تِرسہ جنگ ئنا پتڑ آن مُر مننگ نا فرمان تِسر۔ سرمچار تنظیم ئنا مُست آن مروکا فیصلہ و جنگی راہ بند آتے آ پابند مرسہ پولیس ئے زیات نسخان تننگ آن گریز کریر و تینا مُچ خیال ئے قوضہ کروک فوج آ کریر۔ سرمچار آتا دا جلہو آن پد دشمن فوج خُلیس نا گواچی مرسہ تینا لاری تے کسر آ الیسہ پدی مسر و خلیس نا سوب آن 3 گنھٹہ اسکان خڑک ئنا چیل و بنج آتیٹی تینے ڈھکار۔
ترجمان بیان ئٹی پارے کہ دا سرسوب جلہو آن پد حالیت ئے تینا کنٹرول ئے برقرار تِخننگ تون سرمچار آک بھاز ہرے اسکان ہمو جاگہ غا ساڑی اسر و اوکان گدرینگوک ہندی بلوچ شاری تے رکھوک کسر آتا کنڈ کسرشونی کریر۔ ہندا وخت سرمچار آک کسر ئٹ جوڑ پہل ئے مالو آن سخت کروک آئی ای ڈی (IED) تراک تون اوار ترخفیر و بھس کریر۔ دا تراک ئنا زد ئٹی بَروک موٹر سائیکل آتے آ سوار قوضہ کروک فوج نا پین اِرا کارندہ جاگہ غا کھسکر۔ دا پورَو کارروائی ٹی دشمن نا مچی وڑ ئٹ 8 کارندہ کھسکر و بھاز آک ٹپی مسر۔ سرسوب کارروائی ئے پورو کننگ آن پد سرمچار آتا مچ دستہ غاک بحفاظت تینا رکھوک ٹھکانہ غاتے آ سر مننگ ئٹ سرسوب مسر۔
ترجمان پارے کہ بی ایل ایف پولیس و لیویز ئٹی اوار ہندی بلوچ کارندہ غاتے اسہ وار ئس پد خبڑدار کیک کہ اوفک راجی آجوئی نا دا جنگ ئٹی قوضہ کروک پاکستانی فوج نا وسیلہ جوڑ مننگ آن پدی مریر۔ آئندہ امر ءُ ہم کارروائی یا گشت ئنا دوران ہندی پولیس فورسز قوضہ کروک فوج نا ہمکسر، یا او نا سہولت کاری ٹی نظر بس تو اودے دشمن فوج نا بشخ خیال کرسہ ٹک کننگ مرو و اوڑتون ہچو رعایت ئس کننگ مروف۔
میجر گہرام بلوچ مُستی پارے کہ بی ایل ایف نا سرمچار آک اسہ پین کارروائی ئسیٹی 22 جون 2026 آ تمپ ئنا ہند بالیچہ ٹی قوضہ کروک فوج ئنا اسہ چیک پوسٹ ئسے گرنیڈ لانچر تے ئٹ ٹک کریر۔ دا جلہو ئٹی قوضہ کروک فوج ئے جانی و مالی نسخان ہرفوئی تما۔
جلہو آن پد فوجی لاری تون اوار دشمن نا اسہ کمکی کاروان ئس سرمچار آتا رند ئے ہرفنگ نا کوشست کرے، ولے مست آن سنگر ہلوک تیار سرمچار آک رند ئٹ بروکا کاروان نا لاری تے آ بھاز خڑک آن جلہو کریر۔ دا ورندی کارروائی ٹی قوضہ کروک فوج ئنا چار کارندہ ٹپی مسر، اوڑان پد دشمن فوج پین پیش قدمی کننگ نا جاگہ غا حیران مرسہ پدی مننگ آ مجبور مس۔
ترجمان پارے کہ اسہ پین کاروائی ئسیٹی بی ایل ایف نا سرمچار آک 15 جون 2026 آ دشت ئنا ہند تیرامیل ئٹی سخت ناکہ بندی کرسہ لاری تا پٹ ءَ پول نا عمل ئے بناء کریر۔ ناکہ بندی نا وخت مچھ ئٹی جوڑ گیس کمپنی نا سیکورٹی گارڈز آتا لاری ئسے سلفسہ پٹ ءَ پول کننگا، ہراٹی سوار سلاہ بند بندغ آتے دزگیر کریر۔ سرمچار آک دافتا قوضہ غان 4 کلاشنکوف دوی کریر، داڑان پد مچ دزگیر کروک کارندہ غاتے گل ئنا پالیسی و انسانی ہمدردی نا بنداو آ یلہ کننگا۔
میجر گہرام بلوچ ایسر ئٹ پارے کہ بلوچستان لبریشن فرنٹ بارکھان ئٹی قوضہ کروک فوج و سول انتظامیہ نا اوار انگا کاروان آ جلہو ئٹی 8 کارندہ نا کھسفنگ، بھاز آتا ٹپی کننگ، لشکری لاری تے بھس و پل ئے ناکارہ کننگ، تمپ ئنا ہند بالیچہ ٹی قوضہ کروک فوج ئنا چیک پوسٹ و کمکی کاروان ئے ٹک کننگ، دشت ئٹی ناکہ بندی و سلاہ ضبط کننگ نا ذمہ واری ہرفنہ۔
