بلوچ نیشنل موومنٹ (BNM) نا ترجمان پڑو کرینے کہ 28 جون آ ڈاکٹر دین محمد بلوچ نا زوراکی ئٹ بیگواہی ئے 17 سال پورَو مننگ آ تنظیم نا چیپٹر و زون آک بلوچستان و تیبہ جہان ئٹی سرگرمی تا اسہ سلسلہ ئس اڈ تِرور۔
دا عمل تیٹی عوامی آگاہی مہم، پمفلٹ نا بشخنگ، برانز، دیوان و اقوام متحدہ و بندغی حق آتا بھاز آ بین الاقوامی تنظیم آتے خواست جمع کننگ اوار ءِ۔
ترجمان پارے کہ ڈاکٹر دین محمد بلوچ دن کہ پارٹی نا مرکزی کسرشون، پنی ءُ طبیب و راج دوست ءُ بندغ ئس اَس، پاکستان لشکر 28 جون 2009 آ ہسپتال ئٹی اونا رہنگوک آ کوارٹر آن اودے زوراکی ئٹ بیگواہ کرے۔ او نا بیگواہی نا 17 میکو برسی آ پارٹی اودے "آجوئی بندیگ” (آجوئی نا بندی) نا خطاب ئے ایتک۔ اونا فکری خذمت و سیاسی جدوجہد ئے ظاہر کننگ نا خاطر جہانی تیبر آ دیوان اڈ تننگ مرو۔
ترجمان نا رد ئٹ ڈاکٹر دین محمد بلوچ نا زوراکی ئٹ بیگواہی بلوچ راجی جنز نا بر خلاف ریاستی کریک ڈاؤن و بندغی حق آتا سخت انگا خلاف ورزی نا پاش ءُ چیدہ ئس ءِ۔ او نا مقدمہ ہمو ہزار آ بلوچ بندغ آتا کسرشونی ئے کننگ ءِ، ہرافتے گدرینگوکا اِرا دہک آتا دوران زوراکی ئٹ بیگواہی نا نشانہ کننگا و تینا خاہوت آتے انصاف نا انتظار ئٹی مدامی حالیت آتیٹی اِلّار۔
درشان ئٹی مستی زور شاغنگا کہ دا پروگرام آتا مسخت ڈاکٹر دین محمد بلوچ تون آوار زوراکی ئٹ بیگواہ مروکا بلوچ بندغ آتا مقدمہ آتے جہانی پلیٹ فارم آتا ظاہر کننگ و جہانی برادری نا خیال ئے بلوچستان ئٹی بندغی حق آتا خطرناک حالیت نا نیمہ غا ہڑسینگ ءِ۔
