بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک بیان ئسیٹی پارے کہ بی ایل ایف نا سرمچار آک 24 فروری آ پَسنی نا ہند کلانچ ڈوکانی نا ہند آ پاکستانی لشکر نا چیک پوسٹ آ ارا نیمہ غان بھلا سلاہ تیئٹ جلہو کریر ۔ سرمچار آک دا کاروائی ئے بھاز خُڑک آن کریر ہراڑان پاکستانی لشکر نا پنچ کارندہ خلنگار و کیہیک ٹپی مسُر۔
او پارے کہ ہندا دے آ اسہ پین کاروائی سیٹی بی ایل ایف نا سرمچار آک خاران نا شار گزی روڈ آ جوڑ مروک فوجی چیک پوسٹ آ گرینڈ لانچر نا گولہ خلکُر ہرا تینا ٹک کروک آ جاگہ آ لگار ہراڑان فوج ئے جانی و مالی نسخان رسینگا۔
ترجمان پارے کہ بی ایل ایف نا سرمچار آک 25 فروری آ اسہ کاروائی سیٹی دشت ئنا ہند سنگائی ٹی سی پیک روڈ آ جوڑ مروک پاکستانی لشکر نا چیک پوسٹ آ جلہو کریر ۔ دا چیک پوسٹ ہندی گاڑی تا نگرانی کے جوڑ کننگ مسنے و لس مخلوق ئے تنگ کرینے ، جلہو نا وخت آ سرمچار آک فوجی چیک پوسٹ آ کیہی راکٹ خلکُر ہرافک چوکی نا تہہ ٹی تمار ۔ دا کاروائی ٹی پاکستانی لشکر ئے جانی و مالی نسخان رسینگا ۔
او پارے کہ ہندا دے آ اسہ پین کاروائی سیٹی سرمچار آک کوزہ گیر لشکر کن راشن دروک لاری ئسے زامران نا ہند نوانو و گیشردان نا نیام ئٹی ہلکُر ۔ دا لاری ٹی دشمن لشکر کِن کَنُ خور نا سامان تون اوار اوفتا پین کارمز کروئی ءُ سامان تے ضبط کریر۔
ترجمان پارے کہ بلوچستان لبریشن فرنٹ پَسنی نا ہند کلانچ ئٹی فوجی چیک پوسٹ آ جلہو ئٹی پنچ کارندہ نا خلننگ ، خاران و دشت ئٹی جوڑ مروک چیک پوسٹ و زامران ئٹی فوجی راشن تے ضبط کننگ نا ذمہ واری ئے ہرفِک ۔
