بلوچستان نا ضلع پنجگور آن پاکستانی فوج مُسہ ایلم تیتون اوار پنچ بندغ آتے دزگیر کننگ آن پد بیگواہ کرے۔
دا تدینی استو شام پنجگور نا علاقہ خدابادان ئٹی مس ہراڑے کیہی اُراتیا چھاپہ خلنگا۔ ہندی حوال تا رد ئٹ چھاپہ تا وخت زالبول و چُناتے زوراکی نا گواچی کننگا و اُراتا گِڑا تے پرغار۔
بیگواہ کننگوک آ بندغ آتا چائنداری بختیار ولد حاجی محمد حسین، عرفان ولد حاجی محمد حسین، بلال ولد حاجی محمد حسین، اویس احمد ولد یار محمد و حسن ولد خلیل نا پن تیٹ مسنے۔
خاہوت نا رد ئٹ بختیار، عرفان و بلال ایلم ءُ۔
ہندی حوال تا رد ئٹ دا کاروائی نا وخت سُمکاری ہم کننگا، ہراٹی اویس احمد ٹپی مس۔
خاہوت پارینے کہ فوج اودے ٹپی حالیت ئٹی تینتون درینے، واہم اونا حالیت نا بابت ئٹ ہچو حوال تننگ متنے۔
