بلوچستان نا ضلع کیچ ئنا علاقہ بلیدہ آن پاکستانی لشکر اسہ چُنک سن مار ئس دزگیر کننگ آن گڈ بیگواہ کرینے۔
حوال تا رد ئٹ بلیدہ نا تحصیل ریکو آن بیگواہ کننگوک چُنک سن طالب حسین نا خاہوت اونا زوت آجوئی نا خواست کرینے و پارینے کہ لال جان نا مار طالب حسین ئے 13 جنوری آ ننکان دو بجہ نا وختا پاکستانی لشکر علاقہ ئے گھیرہ کننگ و اُرا تیا چھاپہ خلنگ نا وختا بیگواہ کرینے۔
خاہوت نا رد ئٹ چھاپہ نا وختا چُنا نیاڑی تے ہم بیم ئنا گواچی کننگا۔ تدینی آن گڈ او علاقہ نا معتبر و بھلا شخصیت آتا باور تننگ آ چُپ کریر و تینا مار ئنا آجوئی نا ودار کریر، واہم دہ دے گدرینگ آن گڈ ہم اودے نہ تو طالب نا بارو ئٹ اوفتے حوال تننگانے نئے کہ اودے آجو کننگانے۔
خاہوت نا پاننگ ءِ کہ دا اولیکو وار اف کہ طالب حسین تون دہنو تدینی ئس مسنے، بلکہ خدو طالب حسین تینا ڈگار تیٹی مزوری کننگ اس و ہیٹ خوافنگ اسک کہ اسہ بندغ ئس ہرا تینے ریاستی ادارہ غاتون تفوک پائک، ہموڑے بس و بیدس سوب آن طالب حسین ئے بیدادی نا گواچی کرے۔
خاہوت پارے کہ غریبی و مننگ کروک نسخان نا خُلیس آن او دا رد ئٹ ہچو قانودی کاروائی کتوس۔
طالب نا خاہوت خواست کرینے کہ اوفتا چُنا ئے زور و سرسلامت آجو کننگ مرے۔
