حوال تا رد ئٹ کوئٹہ نا علاقہ کلی قمبرانی روڈ آن حسیبہ قمبرانی نا ایلم حسان قمبرانی ئے پاکستانی لشکر اُراغا چھاپہ نا وختا دزگیر کرسا بیگواہ کرینے۔
حوال تا رد ئٹ استو نن نیمہ غا پیہُن رنگ ئنا چُنکو و مون رنگ ئنا ویگو گاڑی تیٹی سوار ایف سی، سی ٹی ڈی و ایم آئی نا کارندہ غاک حسیبہ قمبرانی نا اُراغا چھاپہ خلکُنو و اونا ایلم حسان ئے زوراکی ئٹ تینتو درینو۔
خیال ئٹ مرے کہ حسان قمبرانی ئے داکان مُست 14 فروری 2020 ئٹ زوراکی ئٹ بیگواہ کننگاسس۔ یک و نیم سال ئنا بیگواہی آن گڈ اودے 7 مئی 2021 ئٹ آجو کننگا و داسا اسہ وار پدا اودے زوراکی ئٹ بیگواہ کننگانے۔
