بلوچستان نا ضلع کیچ ئنا علاقہ تربت و خاران آن 5 بندغ زوراکی ئٹ بیگواہ کننگانو، اندن کوئٹہ، گوادر و تمپ آن 5 بندغ آجو مسنو۔
ضلع کیچ ئنا بنجائی شار تربت ئٹ 15 جنوری آ اسپتال نا مونا پاکستانی لشکر اسہ ورنا ئس دزگیر کننگ آن گڈ بیگواہ کرینے ہرا نا چاہنداری مہران بلوچ ولد بیگ محمد نا پن ئٹ مسنے۔ پن کروک ورنا بل نگور نا جہی ئس ءِ و نرسنگ خوانِک۔
ایلو کنڈ آن خاران شار ئٹ پاکستانی فورسز نا کنڈ آن بھلو آپریشن ئس مننگ ءِ و علاقہ گھیرہ ئٹ ءِ۔ ڈیری فارم محلہ بلوچ آباد ئٹ چھاپہ نا وختا اویس احمد قمبرانی ولد محبوب قمبرانی ئے گاڑی تون اوار دزگیر کننگانے۔
اندن خاران شار و ہیب ئہ کھیب ئٹ برجاء آپریشن نا وختا مخفر عابد سیاپاد، منیب سیاپاد و احمد سیاپاد پنیئو مُسہ ورنا زوراکی ئٹ بیگواہ کننگانو۔
داکان بیدس ضلع کیچ ئنا تحصیل تمپ ئنا علاقہ ہوت آباد و بالگتر آن 7 جنوری آ بیگواہ کننگوک صغیر ولد الہٰی بخش، سلام ولد خالد و فضائل ولد محمد رفیق آجو مسنو۔
اندن ضلع گوادر نا تحصیل جیونی پانوان آن 13 جنوری آ بیگواہ کننگوک منیر ولد جان محمد و دشت، مستونگ آن 26 دسمبر 2025 آ زوراکی ئٹ بیگواہ کننگوک امجد علی ولد محمد سلطان 15 جنوری آ بالترتیب گوادر و کوئٹہ آن آجو مسنو۔
