حوال تا رد ئٹ کراچی آن اسہ چُنک سن خوانندہ ئس و بلوچستان نا علاقہ پنجگور آن اسہ ورنا ئس زوراکی ئٹ بیگواہ کننگانو، و جمعیت علمائے اسلام نا سروک علی محمد قلندرانی نا مار یوسف علی قلندرانی آجو مسنے۔
حوال تا رد ئٹ 17 سالی خوانندہ امیر ولد جاسم ولی داد ہرا ضلع کیچ ئنا علاقہ مند بلوچ آباد نا جہی ئس ءِ، کراچی نا علاقہ لیاری، آٹھ چوک آن بیگواہ کننگانے۔
پن کروک ورنا ئے 19 دسمبر 2025 آ شام ئنا 6 بجہ نا وختا ایم آئی و سی ٹی ڈی نا کارندہ غاک دزگیر کننگ آن گڈ بیگواہ کرینو۔ خاہوت نا پاننگ ءِ کہ تدینی آن گڈ امیر نا بارو ئٹ ہچو حوال ئس رسینگتنے۔
ایلو کنڈ آن حب چوکی نا علاقہ الہ آباد ٹاؤن آن پنجگور نا جہی ورنا کلیم اللہ ولد حاجی اسد اللہ ئے ننکان دو بجہ نا وختا اونا اُراغان نادرست بندغ آک بیگواہ کرینو۔
خاہوت آن رسینگوک حوال تا رد ئٹ کلیم اللہ نا تعلقداری خدابادان، پنجگور آن ءِ و تدینی آن گڈ اونا بارو ئٹ ہچو حوال ئس رسینگتنے۔
ایلو کنڈ آن جمعیت علمائے اسلام نا سروک علی محمد قلندرانی نا مار یوسف علی قلندرانی آجو مسنے۔
خیال ئٹ مرے کہ یوسف علی قلندرانی ئے خدو 17 اگست آ کراچی آن زوراکی ئٹ بیگواہ کننگاسس و پدان اودے 3 ایم پی او نا رد ئٹ خضدار جیل آ رادہ کننگاسس۔
