کیچ: تجابان ئٹی زالبول آتون اوار زوراکی ئٹ بیگواہ کننگوک آ بندغ آتا آجوئی کن سی پیک کسر بلاک، برانز ارٹمی دے برجاء ءِ۔
تربت نا علاقہ تجابان ئٹی چار بندغ نا زوراکی ئٹ بیگواہی نا برخلاف خاہوت آک کالخواہ نا نیمہ غان معاہدہ نا خلاف ورزی نا برخلاف اسہ وارس پدا سی پیک کسر بلاک کننگانے۔ برانز ارٹمی دے ہم برجاء ءِ، ہراڑے سخت یخ آن پد ہم زالبول و چُناک شام ئنا اوندائی ٹی کسر آ ساڑی ءُ۔
برانزی تا پاننگ ءِ کہ ضلعی کالخواہ تون ہنوکا ہفتہ آ مروکا مذاکرات ئٹی بیگواہ کننگوک آ بندغ خاص زالبول آتا آجوئی نا یخین تننگاسس اوکان پد برانز ایسر کننگ مس واہم وعدہ آتا عمل وے مننگ نا سوب آن پدا برانز بناء کننگانے۔
برانزی تا پاننگ ءِ کہ اسہ خاہوت نا چار بندغ داسکان بیگواہ ءُ ہرافتیٹی اِرا زالبول اوار ءِ ہرافتیٹ اسہ زالبول ئس بیجان ءِ۔ برانزی تا پاننگ ءِ کہ بیگواہ کننگوک آتا آجو وے مننگ آ خاہوت آک سخت پریشان ءُ۔
یات مرے کہ پن کروکا بندغ آتے حب چوکی آن برمتہ کرسا بیگواہ کننگاسس و پدا فوج ئنا نیمہ غان میڈیا ٹی ہندا بیان تننگانے کہ دا بندغ آک فدائین ءُ ولے خاہوت دا دوبہ آتے رد کرینے۔
برانزی تا پاننگ ءِ کہ جہان اسہ نیمہ ئس پوسکنا سال ئنا خوشی تیٹ آختہ ءِ و ایلو نیمہ غا بلوچستان ئٹی زالبول و چُناک تینا بندغ آتیکن سخت یخ ئٹی ہم کسر تیا برانز ئکن مجبور ءُ۔
داسکان ضلعی کالخواہ نا نیمہ غان دا بابت ئٹ ہچو بیان ئس مونی بتنے نہ کہ پین دیمروی ئس مسُنے۔
