مستونگ آن زوراکی ئٹ بیگواہ کننگوک فرید احمد کرد و محمد ندیم نا خاہوت کوئٹہ ٹی برجاء انگا وائس فار بلوچ مسنگ پرسنز نا برانزی کیمپ ئٹی میڈیا ٹی شنگ کروک بیان ئسیٹی پارے کہ او دا پریس کانفرنس ئٹ زوراکی ئٹ بیگواہی تا اذیت کروک حالیت ئے مونی ہتنگ خواہک۔
تینا بیان ئٹی فرید احمد کرد ئنا ایڑ پارے کہ بلوچستان ئٹی ہڑدیئی بنیات ئٹ جتا علاقہ تیان بندغ آتے بیدس عدالت آن زوراکی ئٹ بیگواہ کننگ ءُ، ہرانا سوب آن زیمی مروکا خاہوت ہندنو اذیت و تکلیف ئسیان گدرینگِک ہرا درشان کننگ مفک۔
او پارے کہ 2 دسمبر 2025 نا سوب ئنا دہ ءُ نیم بجہ غا کولپور بائی پاس ضلع مستونگ ئٹی اونا ایلُم فرید احمد کرد ئے ہمو وخت پاکستانی فوج دزگیر کرے ہرا وخت او ہوٹل ئٹی کاریم کننگ اسک۔
تدینی ئے 24 دے گدرینگانے ولے خاہوت ئے داسکان خبر اف کہ اودے ہراڑے و انت دوبہ ٹی دننگانے۔
خاہوت نا رد ئٹ ہندا دے پین 20 یا 25 بندغ آتے ہم پاکستانی فوج دزگیر کریسس اوکان پد اوفتے یلہ کننگا واہم فرید احمد کرد داسکان بیگواہ ءِ۔
ایڑ تہ پارے کہ اوفتے ہڑدے تسلی تننگ ءُ کہ اینو یا پگہ اودے یلہ کننگ مرو نہ ایف آئی ار نوشتہ کننگ ءُ و نہ پین ادارہ ئس اوفتا ہیت ئے بننگ کن تیار ءِ۔
او پارے کہ فرید احمد کرد ولد محمد رفیق کرد اسہ کاروباری بندغ ئسے و ضلع مستونگ، تحصیل دشت بائی ہاس آ تینا ذاتی ہوٹل ئس جوڑ کننگ اسک و اونا ہچو سیاسی تنظیم ئسیتون سیالی اف۔
خاہوت پارے کہ ہندُن اوفتا اسہ پین خُڑک ئنا سیال ئس محمد ندیم کرد ولد مہیم خان کرد ہرا ضلع مستونگ نا محکمہ صحت ئٹی پولیو ورکر ئسے، پولیو مہم ئنا وخت پاکستانی لشکر اودے دزگیر کرسا نادُرست جاگہ ئس درے ہراکان پد او داسکان بیگواہ ءِ۔
ایسر ئٹ خاہوت پارے کہ او مجبور مرسا تینا فریاد ئے پرنٹ و سوشل میڈیا نا کمک ئٹ اُلس و کالخواہ تے اسکان سر کننگ ءُ تانکہ وزیراعلٰی بلوچستان، آئی جی ایف سی، کور کمانڈر و ایلو کالخواک اونا بے گناہ ایلم فرید احمد کرد و سیال محمد ندیم کرد نا زوت آجوئی ئے یخینی جوڑ کیر۔
