بلوچستان نا کاروباری شار حب چوکی آن پاکستانی لشکر نا دُو آن ارا بلوچ زالبول خیر النساء و ہانی تون اوار اوفتا خاہوت نا پین اِرا بندغ نا زوراکی ئٹ بیگواہی نا برخلاف ضلع کیچ ئنا ہند کرکی تجابان و ہیرونک نا ہند آ برجاء برانز ارٹمی دے ہم برجاء سلیس ۔
برانز آن تُربَت ، کوئٹہ، پَنجگُور، آواران ، کولواہ و ہوشاب آن بروک کسر تومکا نیمہ غاتیان ہِن ئہ بر کِن بند ءِ۔
خاہوت نا رد ئٹ اوفتا خاہوت نا چھار بندغ زوراکی ئٹ بیگواہ کننگانو ، ہرافتیٹی اِرا زالبول اوار ءِ، بیگواہ کننگوک بندغ آک 27 سالی آ ہانی بنت دل جان ، 17 سالی آ خیر النساء بنت عبدالواحد ، 18 سالی آ ماجد ولد دل جان و 18 سالی آ فرید ولد اعجاز اوار ءُ۔
خاہوت نا پاننگ ءِ کہ بیگواہ غا زالبول تان اسٹ نا نت نا کُبینی ئے ہشت تو ءِ، ہراڑان اوڑکن بھاز خُلیس ارے ۔
برانزی تیتون مذاکرات کن اسسٹنٹ کمشنر تربت نا بھلنی ٹی استو اسہ مذاکراتی ٹیم ئس برانز نا جہہ آ بس ، بھاز ہیت ئہ گہ کننگ آن پد مذاکرات ہچو نتیجہ ئسے آ متو، ہراڑان سی پیک کسر آ ہن ئہ بر ارٹمی دے ہم بند سلیس۔
برانزیک خواست کریر کہ بیگواہ غا بندغ آتے زوت آجو کیر ، تانکہ خواست آک منِنگَتنو برانز برجاء مرو۔
