بلوچ نیشنل موومنٹ ( بی این ایم) نا نیمہ غان لندن ئٹی شہید بانک کریمہ نا شہیدی نا پنچمی سال دے آ میڈیا ٹی شنگ کروک بیان ئٹی بی این ایم نا چیئرمین ڈاکٹر نسیم بلوچ ہیت کرسا پارینے کہ بانک کریمہ نا شہیدی بھلو نسخان ئسے ولے بلوچ راج تینا شہید آتے او وڑ یات کپک کہ جھان گُمان کیک بلکہلن ننا شہید آک ننے توکل ایترہ۔ بانک کریمہ ہم ہندا ہیت ئنا زیہا یخین کرینے۔ او غم و ڈُکھ آتیٹ تینا ہمت ئے نزور کتنے بلکن او ڈُکھ آتا مونا مزاہمت کرینے۔
او پارے کہ بانک کریمہ بلوچ ہزار آتا کیلو میٹر مُر تینا منشاء ئٹ ہِنتوسس بلکن اونا جند ئنا ڈغار نا حالیت خراب مسُنے، ہندا سوب آن او مجبوری ئٹ ہِنانے۔ پدا ہم او پیشن نا ڈیہہ ئٹی بے توار متنے و تینا ذاتی خواہش آتا پد ئٹ متنے۔
ڈاکٹر نسیم بلوچ پارے کہ خننگ ئٹ بلوچ، سندھی، پشتون و کشمیری مخلوق نا درد و ڈُکھ جتا ءِ ولے کُل ئنا سوَب اسٹ ءِ، دا کُل دڑد و ڈُکھ آتا بنیات پنجاب نا بھلنی ٹی برجاء انگا پاکستان نا ریاست ءِ۔
او پارے کہ بانک کریمہ مُدام ننے ہندا یات آ شاغک ہرا وخت اسکان کمزور آ قوم آک تینے جہد آن جتا پوہ مریر گُڑا نو آبادکار ریاست گیشتر فائدہ ہرفک۔ پاکستان نا ریاست ننا کمزور انگا قوم آتا دڑد و ڈُکھ آتے بشخنگ خواہک تانکہ ننا مزاہمت ہم جتا مرے۔ گُڑا ننے دا گڑا ایسر کروئی ءِ و اسٹ ایلو تون اوار و سوگو مروئی ءِ۔
ڈاکٹر نسیم بلوچ پارے کہ بانک کریمہ اسہ ہندن ءُ ہند ئسیٹی شہید کننگانے کہ ہرا جھان نا شرفدار انگا جاگہ چائنگک، ولے اونا شہیدی نا پنچ سال آن پد ہم اونا کوش ئنا بابت ئٹ ہچو راستی ئس مونی ہتنگ متنے۔ ساجد حسین نا جون ہم یورپ آن دو تما اونا کیس ئٹی ہم انصاف کننگ متنے۔
او پارے کہ شہید بانک کریمہ چائسنے کہ پاکستانی ریاست تنیا ننا ڈغار ئے کوزہ کتنے بلکن ننا تاریخ، ننا زبان، ننا مڈی و ننا چاگڑد نا آجوئی ئے ہم کوزہ کرینے۔
