بلوچ قومی رہشون و بلوچستان لبریشن فرنٹ نا مہبر ڈاکٹر اللہ نذر بلوچ تینا اسہ بیان ئسیٹی پارے کہ بھاز ڈُکھ، رنج و فکری خلا نا احساس ئسیتون انسانی حق آتا پنی آ رہشون ،بندغی اقدار آتیکن بے باک و ریاستی جبر ئنا برخلاف چرجوئی ئٹ مزاہمت نا چیدہ ماما قدیر بلوچ نا بیرانی آ دڑد و اوسوز نا درشانی ئے کیوہ ۔ اونا بیران مننگ بیرہ اسہ فرد ئسینا بیرانی اف بلکن بندغی شرف، چاگڑدی انصاف و سْیاسی شعور نا اسہ بشخ ئسینا ایسری ئے ۔ ہرا کیہی وخت ریاستی جبر ئنا گواچی قوم و زیمی آ خاہوت آتے زُبان و حوصلہ بشخا۔
او پارے کہ ماما قدیر بلوچ تینا مار جلیل ریکی نا زوراکی ئٹ بیگوائی و شہادت نا دڑد ءِ کُننگ آن بیدس ایلو بیگواہ کننگوک بندغ آتا خاہوت آتیکن اسہ اومیت ئس مننگ نا فیصلہ ئے کرے ، او شانزدہ سال اسکان مزاہمت نا بیرک ئے بُڑز کرسہ گُڈی ساہ اسکان جدوجہد ئے برجاء تخا.
ڈاکٹر اللہ نذر بلوچ پارے کہ ماما قدیر بلوچستان نا سخت انگا حالیت ئٹ ریاستی جبر ، زوراکی ئٹ بیگواہی ، بلوچ قوم ئنا نسل کُشی نا برخلاف تینا زند ئنا شانزدہ سال ئے جدوجہد کن ندر کرے ، او ہمو پنی آ بندغ آتیٹی اوار مس ہرافک بندغی حق آتا لتاڑنگ نا برخلاف سْیاسی جہد ئے اجتماعی دروشم ئس تننگ ئٹ بُنداوی کڑد ئس ادا کریر ۔ او اسہ بھلو لانگ مارچ ئس کرسہ دنیا ئے بلوچ قوم ئنا زی آ جبر و لُٹ ئہ پُل آن آگاہ کرے و ریاستی جبر ئنا برخلاف مزاہمت ئٹ اُلس ئے یکجا کرے ۔
او پارے کہ ماما قدیر ہمو وخت ئٹی بندغی حق آتیکن توار بُڑز کرے ہراتم زوراکی ئٹ بیگواہیک زیات اسُر ۔ او جہانی ادارہ تیا بلوچ قوم ئنا توار ئے سر کرے و باور کرفے کہ بندغی حق آتا سوج اسہ خطہ یا قوم ئسے اسکان محدود اف بلکن اسہ جہانی سْیاسی جیڑہ ئسے ، ہراٹی چُپ مننگ ظلم ئنا کمک کننگ ئے۔
بلوچ قومی رہشون پارے کہ ای ماما قدیر بلوچ نا خاہوت تون اُست ہُسونی، رنج و غم ئتون است ہسونی نا درشانی ئے کیوہ ۔ دڑد و ڈکھ ئنا دا تہار آ وخت آ ننا کُل دعاک سوگوار خاہوت تون اوار ءُ ۔ اللہ تعالٰی مرحوم ئے تینا رحمت آتیٹی بُڑز ءُ جہہ ئس بشخے ۔ اونا مغفرت ئے کے و خاہوت ئے دا بھلا نسخان آ صبر جمیل ، حوصلہ و استقامت بشخے۔
