بلوچستان آن سیالی تخوکو وکیل ئس و اسہ ڈاکٹر ئسے زوراکی ئٹ بیگواہ کننگ نا تدینی مونا بسُنے، ہراڑا خاہوت و بندغی حق آتا باسک آک فریشانی نا درشانی ئے کننگ ءُ۔
حوال تا رد ئٹ دشتی بازار تربت آن سیالی تخوکا ایڈوکیٹ حسن حسرت ئے عمان نا دارالحکومت مسقط آن نادُرست سوب آن ڈی پورٹ کننگانے، اوکان پد اودے پاکستان آ ہتنگ مسُنے۔ پاکستان آ سر مننگ آن پد حسن حسرت نا ہچو حوال ئس اف و او بیگواہ ءِ۔ خاہوت نا پاننگ ءِ کہ اوڑتون ہچو حال ئس مننگ اف و نہ اونا بابت ئٹ ڈس ئس تننگ ءُ۔
ایلو نیمہ غا بلوچستان نا بھلا شار کوئٹہ آن اسہ ڈاکٹر ئسے دزگیر کننگ آن پد بیگواہ کننگانے۔ بیگواہ کننگوک آ ڈاکٹر نا چائنداری راشد ولد برکت نا پن ئٹ مسُنے ہرا یورولوجسٹ سرجن ئسے۔
خاہوت نا رد ئٹ ڈاکٹر راشد علی ئے 09 دسمبر نا شام ئنا 11 بجہ غا کوئٹہ آن ریاستی ادارہ تا نیمہ غان فوج آ خواہِفنگاسس۔ ہراتم او ہمو جاگہ ہنا گُڑا اودے دزگیر کریر۔ چھار دے گدرینگ آن پد ڈاکٹر راشد علی نا بابت ئٹ ہچو ڈس ئس اف و نہ دا پاننگانے کہ او اراڑے کے و امر ءِ۔
