بلوچستان نا علاقہ جھاؤ، اورناچ و ہیب ئہ کھیب ئٹ پاکستانی فوج و اونا مُخ تف سلاہ بند ٹولی ڈیتھ اسکواڈ نا کنڈ آن بھلو کچ ئسیٹی لشکر کشی برجاء ءِ۔
تیبہ علاقہ فوجی کنٹرول ئٹی ءِ و تیبہ علاقہ ئٹ کرفیو ءِ، ہرا نا سوب آن جہی مخلوق نا ہڑدیئی کاریمک سلیسُنو۔ شاری تے اُرا تیان پیشتمنگ نا ہم موکل اف۔
جہی مخلوق زرمبش ئے حوال تس کہ سورگر، گروک، اورناچ و جھاؤ نا ہیب ئہ کھیب ئنا غٹ علاقہ آک اندا لشکر کشی نا پلویڑ ئٹی ءُ۔
حوال تروکا پاریر کہ درو منہ بندغ تینا ڈغار تیٹی کاریم ئٹی اسُر کہ پاکستانی فوج ئنا کنڈ آن اوفتے بیدادی نا گواچی کننگا، ہرا نا سوب آن او اُرا تیان پیشتمنگ افس و مخلوق نا ڈغار تا خراب مننگ نا خلیس ہم ارے۔
کیہی بندغ آتا زوراکی نا بیگواہی نا حوال ہم مونا بسنے واہم دا رد ئٹ ودیک حوال داسکان مونا بتنے۔
علاقہ ئٹ فوج ئنا کنڈ آن کیہی چوکی جوڑ کننگانے ہرافتیٹ اورناچ کراس، کاسی کراس، کنجا آباد، بھاہی پاس کاریز، سرداری بھنٹ، ریگو بازار اسکول، اسپتال بازار، دشت کو، خدابخش گوٹھ و اورناچ ڈیم آ ہم اسہ چوکی ئس خلوک ءِ۔
حوال تروکا پاریر کہ دا وختا تراک آتا توار ہم بننگ مسنے، و ہیلی کاپٹر، کواڈ کاپٹر تیتون اوار ڈرون کیمرہ تیئٹ علاقہ نا مخلوق و چُنا نیاڑی تیا نظر تخنگ مننگ ءِ۔
