کوئٹہ نا علاقہ کلی قمبرانی ٹی زوراکی ئٹ بیگواہی تا لڑ ئٹ پنچ شمبے نا دے زیمی مروک خاہوت آک کوئٹہ پریس کلب ئٹ پریس کانفرنس کرسا چُنک سن آ خوانندہ تا زوت آجوئی نا خواست کریر۔
سمروش بلوچ و ایلو بیگواہ کننگوک خوانندہ غاتا خاہوت آتون اوار حوالکار تے پارے کہ منہ تو مُست پاکستانی فوجی کارندہ آک ننا شش چُنک سن آ خوانندہ تے اُراغا چھاپہ نا وخت بیگواہ کریر ہرا داسکان بیگواہ ءُ و اوفتا بابت ئٹ ننے ہچو حوال ئس اف۔ او پارے کہ ہڑدے ئی چھاپہ، ہراسانی و زوراکی ئٹ بیگواہیک خاہوت آتا زند آتے خوار کرینو۔
او پاریر کہ ہنوکا کیہی سال آتیان ریاستی جبر و غیر اعلانیہ چھاپہ تا سوب آن بندغ آک خوف و اذیت نا گواچی ءُ۔ سمروش بلوچ نا رد ئٹ اونا الہ فضل الرحمن قمبرانی و کاکا ضیاء الرحمن قمبرانی ئے اِرا وار زوراکی ئٹ بیگواہ کننگانے و پدا یلہ کننگانے۔
خاہوت پارے کہ 6 دسمبر نا شام ئنا 9 بجہ آن 1 بجہ اسکان علاقہ ٹی سرچ آپریشن کننگا، اُراتے پٹنگا ولے ہچو ممنوع یا غیر قانودی گڑاس خننگتو۔
خاہوت نا رد ئٹ اکتوبر ئٹی حیربیار بلوچ، افضل بلوچ، بیبرگ قمبرانی، نور محمد و حمل قمبرانی تون اوار شش چُنک سن آ خوانندہ تے زوراکی ئٹ بیگواہ کننگا ہرافتے عدالت یا پین ادارہ تیئٹ پاش کننگ افس۔
ایسر ئٹ خاہوت آک پاریر کہ حکومت و کالخواہ تیان خواست کینہ چُنک سن انگا خوانندہ تے زوت آجو کیر و ہڑدے ئی چھاپہ تا لڑ بند کننگ مرے تانکہ بندغ آک سکون ئٹ دم ئس ہلنگ کیر۔
