بی ایل اے نا ترجمان جیئند بلوچ میڈیا ٹی شنگ کروک تینا بیان ئسیٹی پارے کہ ننا سرمچارک مستونگ، مند و کوئٹہ ٹی مُسہ جتا جلہو تیٹی کوزہ گیر پاکستانی لشکر ئے جوانو وڑ ئسیٹ نشانہ کرسا کوزہ گیر لشکر نا یانزدہ کارندہ خلکُر و اسہ کارندہ ئسے زندہ دزگیر کریر۔ جتا کاروائی تیٹی بی ایل اے نا مُسہ سرمچار قاسم ارمان بلوچ عرف الماس، داد خدا مری عرف ریحان و حزیفہ بلوچ عرف گنجل شہید مسُر۔
ترجمان تینا بیان ئٹی پارے کہ 07 دسمبر آ مستونگ نا علاقہ دشت زہری گٹ نا ہند آ سرمچارک دشمن فوج آ ہمو وخت جلہو کریر ہرا وخت اوفک ہندی آبادی نا نیمہ غا زوراکی کِن بننگ اسُر۔ دا جلہو ئٹی کوزہ گیر لشکر نا ہشت کارندہ ہمو جاگہ غا خلنگا و کیہیک ٹپی مسر، سرمچارک دشمن نا اسہ کارندہ ئس سپاہی ظفر اللہ ولد جھنڈا خان ئے دزگیر کریر۔جلہو آن پد دشمن ہیلی کاپٹر، کواڈ کاپٹر و سرویلنس سسٹم ئے کارمرز کرے ولے سرمچارک حکمت عملی ئٹ دشمن نا اِرا کواڈ کاپٹر و اسہ سرویلنس ئسے خلکر۔ دا جنگ اِرا گھنٹہ اسکان برجاء مس ہراٹی سرمچار داد خدا مری عرف ریحان ٹپی مس۔ سرمچارک اودے رکھوک جاگہ ئس دننگ نا کوشست کریر ولے او بھاز ٹپی مننگ نا سوب آن شہید مس۔
ترجمان مُستی پارے کہ ہندا دے سرمچارک کیچ ئنا علاقہ مند ئٹی کوزہ گیر لشکر نا بھلا کیمپ و کرنل رینک افسر نا تولنگ جاگہ ئے نشانہ کریر۔ سرمچارک بھلا گیٹ، رکھوک آ چوکی و تہہ ئنا پوزیشن تیا راکٹ لانچر و خودکار سلاہ تیٹ جلہو کریر۔ دا جلہو ئٹی کوزہ گیر لشکر نا مُسہ کارندہ خلنگا و ارٹ ٹپی مسر۔ دشمن نا نیمہ غان کارمرز مروک کواڈ کاپٹر و کیمرہ تے سرمچارک ناکارہ کریر۔ اِستو شام ئنا کوئٹہ شار ئٹی زراعت کالونی نا خُڑک سرمچارک دشمن نا اسہ چیک پوسٹ ئسے دستی بمب جلہو ئٹی نشانہ کریر ہراٹی کوزہ گیر لشکر ئے نسخان رسینگا۔
ترجمان پارے کہ دا کاروائی تا وخت شہید مروکا سرمچارک تینا زندگی تیٹ جہد، نظم و نظریاتی سیالی نا انامت دار اسُر۔ داد خدا مری عرف ریحان ولد یار محمد مری ہرنائی نا علاقہ پوڑ نا ہندی ئس اسک، او 2022 ئٹی بی ایل اے ٹی اوار مس پدا او بولان، کوئٹہ و مستونگ نا محاذ آتیٹ اہم ءُ ذمہ واری ہرفسہ جوانو دروشم ئسے ئٹ کاریم کرے۔ او شہید سنگت چاکر مری عرف پردیسی و زوراکی ئٹ بیگواہی آن پد شہید کننگوک آ عظیم خان مری نا ایلم اسک۔ ریجان مری اسہ بہادر و جنگی حکمت عملی غیر معمولی بصیرت تخوک ءُ سنگت ئس اسک۔ اونا خاندان نا شش بندغ 2018 ٹی دشمن نا زوراکی تا وخت آ شہید کننگاسُر ہرافتیٹ اِرا زالبول و مُسہ معصوم ءُ چُنا اوار اسک۔ ولے او دا بھلا ڈُکھ آن پد ہم اسہ ساہت ئسیکن آجوئی نا کسر آن مُر متو۔ ریحان مری جتا محاذ تیٹ دشمن ئے بھلو دھک خلک و تینا سنگت آتیکن حوصلہ و نظریاتی استقامت نا چیدہ مرسا کرے۔
ترجمان پارے کہ سرمچار حزیفہ بلوچ عرف گنجل ولد عبدالحمید جیونی، کوثرا نا ہندی ئس اسک۔
او اسہ سال ئسے آن بی ایل اے نا بشخ اسک و تینا کم عمری آن بیدس ہم غیرمعمولی نظم و ضبط و ذمہ واری تون تینا فرض آتے ادا کننگ اس۔ 16 نومبر 2025 آ کیلکور نا محاذ آ فڑض آتا ادائی نا وخت آ دوشہ نا کُننگ آن ٹپی مس و بنداوی جانجوڑی کمک آن بیدس منہ گھنٹہ ٹی شہید مس۔ او نرم گفتار، باوقار و خاموش ولے اعلیٰ معیار تون کاریم کروکو سنگت ئس اسک۔ اونا شہادت ہندا ثابت کیک کہ بلوچ سرمچارک دشمن نا سُم نہ بلکن ہر سخت انگا حالیت ئٹی تینا جان ئے وطن کِن ندر کننگ کِہ تیار ءُ۔
سرمچار قاسم ارمان بلوچ عرف الماس ولد ماسٹر صدیر تربت نا علاقہ آبسر نا ہندی ئس اسک۔ اونا بنداوی تعلیم شاپک آن اسک۔ او اسہ ذہین، تعلیم یافتہ و غیر معمولی صلاحیت تخوکو ورنا ئس اسک۔ او لٹریچر ئٹی بی ایس نا نودربر ئس اسک۔ او انقلابی ادب نا تخلیق، نظریاتی گپ و تران و مزاحمتی شعور نا شنگ کنگ ئٹی ساندہ کاریم ئٹ اسک۔ سیاسی رد ئٹ او تعلیم نا وخت آ بلوچ اسٹوڈنس آرگنائزیشن ئٹی کاریم کریکہ و پدا 2023 ٹی بلوچ لبریشن آرمی ٹی اوار مس۔ ہراڑے او شاری و مشی تومکا محاذ آتا ذمہ واری تے ادا کرے۔ شہادت نا وخت آ الماس بی ایل اے نا انٹیلجنس ونگ زراب ئٹی کاریم ئٹ اس۔ ہراڑے او چنکو وخت ئسے ٹی بھاز غیر معمولی فرض ادا کرے۔ پینگن آ سوچ و تکنیکی مہارت آتا درشانی ئے کرے۔ او اسہ ناگہانی تدینی سینا سوب آن 2 دسمبر 2025 آ شہید مس۔ اونا شہادت بی ایل اے نا فکری و محاذ و انٹیلی جنس نا ڈھانچہ تومکا تیکن ماروکو کمی ئسے۔ انتئے کہ او اسہ ہندنو ورناس اسک کہ او جنگی جدوجہد ئے نظریاتی فکر تون پوہ مننگ و اوفتے علم و عمل نا اواری ئٹ مونا دننگ خواہاکہ۔
بلوچ لبریش آرمی تینا کل شہید آتے سلام پائک، دا ہمراہک نہ بیرہ کوزہ گیر تاغت آتا برخلاف عملی مزاحمت نا ہر اول دستہ اسُر بلکن نظریاتی وڑ ئٹ ہم دا جدوجہد نا مضبوط آ خشت آک اسُر۔ اوفتا قربانیک ہندا ہیت ئنا پڑو ءُ کہ بلوچ راجی آجوئی نا تحریک تینا فرزند آتا استقامت، شعور و دتر تا بنیات آن مونا ہِننگ ئٹی ءِ۔
ایسر ئٹی پک کننگک کہ بلوچ لبریشن آرمی کوزہ گیر ریاست نا برخلاف تینا جلہو تے برجاء تخو۔ ہرا وخت اسکان کوزہ گیر ننا ڈغار آ ساڑی ءِ ننا مزاحمت برجاء مروئے و ننا صف تیٹی اوار تموکا ہر اسہ سنگت نا مشن ئے مونا درسہ کرون۔ بلوچ راجی آجوئی رد مفروکو حقیقت ئس ءِ و بی ایل اے تینا کُل صلاحیت آتیتون اوار دا مزل کِن جدوجہد ئے برجاء تخو۔
