بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک بیان ئسیٹی پارے کہ ننا سرمچارک آواران و جھاؤ ٹی کوزہ گیر فوج و پروم ئٹی ڈیتھ اسکواڈ نا کارندہ تیا جلہو کریر، ہراٹی اِرا فوجی کارندہ و اِرا ڈیتھ اسکواڈ نا کارندہ خلنگار و کیہیک ٹپی مسُر۔
ترجمان پارے کہ سرمچارک 06 دسمبر آ پروم ئٹی تنظیمی گشت آ اسُر کہ ریاستی ڈیتھ اسکواڈ نا کارندہ آک سرمچار تا پد ئٹ بننگ نا کوشست کریر۔ سرمچارک تینا پوزیشن تے ہلکر و سنگر ہلِسہ ڈیتھ اسکواڈ نا کارندہ تے نشانہ کریر، ہراٹی اسہ لاری ئس تیبہ مون ئٹی بس ہراٹی اِرا ڈیتھ اسکواڈ نا کارندہ ہمو جاگہ غا خلنگار و کیہیک ٹپی مسُر۔ جلہو آن پد ڈیتھ اسکواڈ نا ایلو کارندہ آک تینا لاری تے الِّسہ نرانر، پدا کوزہ گیر پاکستانی فوج جلہو جاگہ غا سر مس و خلنگوکا کارندہ تا جون و زیمی مروکا لاری ئے تینتون دریر۔
ترجمان پارے کہ اسہ پین کاروائی سیٹی 07 دسمبر آ بلوچستان لبریشن فرنٹ نا سرمچارک آواران نا علاقہ تیرتیج جک مش آ جوڑ مروکا ایف سی چیک پوسٹ آ سلوک کارندہ سے اسنائپر ئٹ نشانہ کریر، ہرا ہمو جاگہ غا کھسک۔ جلہو آن پد پاکستانی فوج سرمچار تے کواڈ کاپٹر ئٹ نشانہ کننگ نا کوشست کرے ہرادے سرمچارک نشانہ کرسا بٹیر۔
ترجمان مُستی پارے کہ سرمچارک ہفت دسمبر نا شام ئنا پنچ بجہ غا جھاؤ نا علاقہ ڈولیجی ٹی برجاء انگا فوجی چیک پوسٹ آ سلوک اسہ کارندہ سے اسنائپر ئٹ نشانہ کریر، ہراٹی کارندہ ہمو جاگہ غا کھسک۔ جلہو آن پد فوج خلیس نا گواچی مرسا کیہی مارٹر نا گولہ خلک۔
ترجمان پارے کہ بلوچستان لبریشن فرنٹ، راجی آجوئی نا جہد ئٹی شہید مروکا سرمچار ساجد عرف کاکا رحمت ولد عبداللہ گومازی نا ہندی ئے دروت ندر کیک۔
او پارے کہ شہید ساجد بلوچ اسِہ دسمبر 2025 آ تنظیمی محاذ آ ساڑی اسک کہ زہری او ساہدار ئسینا کُننگ آن طب تہ خراب مس ہرانا سوب او کذیت کرے۔ تنظیم اودے اونا بھلا خزمت آتا دروت ندر کیک۔ شہید ساجد بلوچ 2013 ٹی راجی جہد ئٹی اوار مس و بی ایل ایف نا باسک جوڑ مس۔ اسہ سال ئس شہری محاذ آ کاریم کرے و 2014 ٹی مشی محاذ آ بس۔
ترجمان پارے کہ شہید ساجد بلوچ محنت، سوگوی و مثالی روشت تا کمک ئٹ تنظیمی کاریم تے جوانو وڑ ئسیٹ سَر تس و کیہی اہم محاذ آتا بھلو کڑدار سَر تِس۔ شہید ساجد بلوچ تینا سنگت آتون کیہی جنگی محاذ آتا سرسوب جنگ آتیٹی اوار اسک۔ شہید ساجد بلوچ تمپ، مند، تربت، گوادر، زامران و دشت ئتون اوار کیہی علاقہ تیٹ تنظیمی کاریم تیٹ بشخ ہلک۔ شہید ساجد بلوچ تینا مہارت جنگی صلاحیت آتا سوب آن تینا خُڑک ئٹ “ٹک تیر” نا پن ئٹ پِنی اسک۔
ترجمان ایسر ئٹ پارے کہ بی ایل ایف آواران، جھاؤ و پروم ئٹی پاکستانی فوج و ڈیتھ اسکواڈ کارندہ تے خلنگ نا ذمہ واری تے ہرفک و بلوچستان نا آجوئی کن شہید مروکا ساجد بلوچ ئے دروت ندر کرسا دا قول ئے کیک کہ شہید آتا مشن نا سرسوبی کن جہد برجاء مرو۔
