شہید کریمہ بلوچ نا شہیدی نا دے ئنا رد ئٹ بلوچ نیشنل موومنٹ (بی این ایم) نا کنڈ آن 20 دسمبر آ لندن ئٹ "کریمہ بلوچ: نودربر راہشون آن مزاحمت نا جہانی چیدہ اسکان” نا سرحال ئٹ سیمینار ئس اڈ تننگ مرو۔
دا سیمینار ئٹ بلوچ قوم تون اوار ایلو محکوم آ قوم آتا نمائندہ غاک، سیاستدانک و اسکالر آک اوار مرور و بانک کریمہ بلوچ نا شخصیت، کڑد و سیاسی جہد ئنا زہم آتیا تینا خیال آتا درشانی ئے کرور۔
داکان بیدس، بی این ایم تینا غٹ چیپٹر و زون آتے پنت کرینے کہ او شہید بانک کریمہ نا شہیدی نا دے ئنا رد ئٹ یاتگاری ریفرنس اڈ ایتر۔
بانک کریمہ بلوچ بلوچ سیاسی دیہاڑ و قومی تحریک نا بھلا و پنی آ شخصیت آتیان اسٹ ءِ۔ اونا سیاسی زہم جہانی تیبر آ منوک ءِ۔
برطانیہ نا پنی آ حوالکاری ادارہ ’بی بی سی‘ 2016 ئٹ اونا پن ئے جہان نا سد زہم تخوک زالبول آتون اوار کریسس۔
او بلوچ اسٹوڈنٹس آرگنائزیشن (بی ایس او) نا دیپاڑ نا اولیکو زالبول چیئرپرسن اس و پدان بلوچ نیشنل موومنٹ (بی این ایم) ئٹ اوار مسس۔
