بلوچ وائس فار جسٹس تینا چاگڑدی حوالکاری تلہ غان بیان ئس شنگ کرسا پارے کہ بھاز فریشانی ئٹ نن دا گواچن نا پیدواری ئے کینہ کہ بلوچ قوم پرست راہشون واحد قمبر ئے 19 جولائی 2024 آ ایران آن پاکستانی انٹیلیجنس ایجنسیک زوراکی ئٹ بیگواہ کریر و پک انگا حوال تا رد ئٹ اودے پاکستان آ ہتنگ مسنے، ہراڑے او دا وختا پاکستان نا ڈھکوک ایجنسی تا بے قانودی دزگیر ئٹی ءِ۔
او پاریر کہ واحد قمبر بلوچ نا دزگیر آن سرکاری نمن، اونا بندی جہہ ئنا بارو ئٹ حوال تفننگ و اونا خاہوت ئے تیبہ لاعلم تخنگ جہانی بندغی حق آتا قانود آتا رد ئٹ زوراکی نا بیگواہی تیٹ حساب مریک، ہرا بندغی حق آتا بھلو لتاڑ ئس ءِ۔
بلوچ وائس فار جسٹس پارے کہ واحد قمبر داکان مُست ہم کیہی سال اسکان زوراکی ئٹ بیگواہ اسک، و آجوئی آن گڈ اودے تینا ڈیہہ ئے الوئی تماسس۔ اونا اسٹ انگا ڈوہ دادے کہ او بلوچ الس ئنا حق، خودمختاری و بندغی شرف کن توار بڑز کریکہ۔ دہن انگا سیاسی کاریم کروکا تے ٹک کننگ بیرہ اسہ بندغ کن بے انصافی ئس اف بلکہ اسہ تیبئو راج ئسے بے دُوی کننگ نا اسہ منظم حکمتِ عملی ئس ءِ۔
او پارے کہ واحد قمبر دا وختا ریاستی ڈھکوک ایجنسی تا دزگیر ئٹی ءِ، اندا سوب آن الّمی ءِ کہ اودے دمدستی اونا خاہوت تون اوڑدئی، وکیل و المی جانجوڑی کمک، اونا جانجوڑی، حالیت و جہہ ئنا بارو ئٹ ساف و پکو حوال تننگ ریاست نا بنداوی ذمہ داری ءِ، ہراڑان نمن بے قانودے و بے بندغی گھام ئس ءِ۔
بلوچ وائس فار جسٹس جہانی کہول، بندغی حق آتا تنظیم، سول سوسائٹی و میڈیا آن حواست کرے کہ واحد قمبر نا زوراکی نا بیگواہی آ بادُوی کیر، دا ویل ئے پھاش کیر و دا یخینی کیر کہ اونا بنداوی بندغی حق آک رکھوک مریر و اودے تینا خاہوت ئے خننگ و قانودی نمائندہ غاتون اوڑدئی نا حق رسینگِہ۔
