بلوچ نیشنل موومنٹ نا جارکش پارے کہ ڈاکٹر منان و سنگت آتا ہشتمی برسی نا دے کُل زون ، چیپٹرز و سیل سسٹم آک یات گاری ریفرنسز و پروگرام اڈ تیر و سوشل میڈیا ٹی دا ہیش ٹیگ #MartyrsOfMastung ئے کارمرز کِیر تینا عظیم اِنگا لیڈر و سنگت آتے خراج عقیدت ندر کِیر۔ ڈاکٹر منان بلوچ ، اشرف بلوچ ، حنیف بلوچ و ساجد بلوچ ئے 30 جنوری 2016 آ پاکستانی لشکر مستونگ ئٹی بی این ایم نا سینئر انگا سنگت اشرف بلوچ نا اُراٹی سُہب مہالہ جلہو کرسا شہید کرے۔ ڈاکٹر منان بلوچ بی این ایم و بلوچ راجی تحریک ئےمنظم کننگ و تہین پہ تہی جیڑہ آتا خلاسی تیکِن مستونگ تون اوار کیب نا ہند آتا دورہ کننگ ئس۔
جارکش پارے دا اولی وار اَف کہ بی این ایم نا اسہ اہمءُ رہشو ئس قربانی تسُنے بلکِن بی این ایم نا تاریخ قربانی آن پُرءِ۔داٹی پارٹی نا بیخ تخوک سربراہ واجہ غلام محمد بلوچ آن ہلیس عام باسک اِسکان تینا جان آتے ندر کرسا تاریخ ئے زندہ کرینو۔چیئرمین غلام محمد نا شہادت آن پد پارٹی نا بازنگا بنجاہی لیڈرآک دِتر ترسا دا جُہدئے اینو اِسکان زندہ تخانو۔داڑن بیدس ڈاکٹر دین محمد بلوچ ، غفور بلوچ و رمضان بلوچ تُون اوار کیہی لیڈر آک سال آتا سال پاکستانی لشکر نا ڈکھکوک انگا بندی جاگہ تیٹی تکلیف سگنگءُ۔
ترجمان پارے واجہ غلام محمد نا شہادت آن پد ریاست ہندا خوشی و گلَ ئٹی اسک کہ چیئرمین غلام محمد آن پد پارٹی ختم مَس ولے ڈاکٹر منان بلوچ و سنگت آک ریاستی جبرئنا مقابلہ کرسا جوانو دروشم سیٹ بی این ایم ئے منظم کریر۔ڈاکٹر منان بلوچ بلوچستان نا کُنڈ کُنڈ ئنا دورہ کرے بی این ایم نا پروگرام و بلوچ راجی تحریک ئے زندہ تخِنگ کِن نن و دے محنت کرے۔ اونا کروکا کاریم آک اینو ننا مون ئٹیءُ۔
جارکش پارے شہدائے مستونگ ئٹی سنگت بابو نوروز بلوچ اَسہ مصنف و دانشور ئس اسک، او بی این ایم نا پلیٹ فارم تون اوار تینا قلم نا زریعہ ئٹ ہم بلوچ راجی مسلئہ ئے مونی دننگ و راج ئے آگاہی تننگ ئٹی اوار ھوار ئس۔کم انگا عمر ئٹی شہید مروکا ساجد بلوچ ، بی این ایم نا سینئر انگا باسک اشرف بلوچ و حنیف بلوچ تینا سیاسی پند آتون بلوچ راجی تحریک ئٹی بھاز جوانو کڑدار ادا کرینو تینا دِتر نا گُڈی پِٹ اِسکان بلوچ راجی تحریک ئے مونی درینو۔ اوفتا قربانیک نن کِن اَسہ روشن ءُ کسر ئس ملانو۔بلوچ راجی آجوئی جُہد ئنا کَسر ئٹی قربانی تروکا سنگت آک مدام ننا اُست آتیٹی زندہ سلور۔
