بلوچستان نا ضلع کیچ ئنا علاقہ مند ئٹی استو سلاہ بند بندغ آک پاکستانی فوج ئے جلہو تیٹ ٹِک کریر و اسہ پہل ئسے تراک کرسہ بھس کریر۔
حوال تا رد ئٹ درو دشت ئٹی دریا چم و شند نا نیام ئٹی سلاہ بند بندغ آک پاکستانی فوج ئنا کاروان آ مُست سنگر ہلیسہ جلہو کریر، ہراٹی فوج ئے جانی و مالی نسخان رسینگانے۔ جلہو آن پد ہمو جاگہ آ ہیلی کاپٹر برسہ تینا ٹپی و لاش تے درے۔
ہَندُن مند ئنا مشی علاقہ شیپچار ئٹی ہم سلاہ بند بندغ آک استو پاکستانی فوج ئنا چیک پوسٹ ئسے ٹِک کریر۔ جلہو ئٹی فوج ئے جانی نسخان رسینگانے۔
ہندُن مند ئنا علاقہ کوہ ڈگار ئٹی نادُرست سلاہ بند بندغ آک درو اسہ پہل ئسے تراک کرسہ بُھس کریر، ہرانا سوب آن کسر بند مسنے و لاری تا ہن و بر زیمی ءِ۔
دا جلہو تا زمہ واری تے داسکان ہچو تنظیم ئس ہرفتنے۔
