بلوچ آجوئی خواہوک رہشون عبدالنبی بنگلزئی بلوچستان نا کٹ پتلی وزیر اطلاعات نا درشان آ تنقید کرے ہراٹی او بلوچ یکجہتی کمیٹی نا رہشون ڈاکٹر ماہ رنگ بلوچ نا لوز آتے رد کرسہ، پروپگنڈا نا رنگ ئے تِس۔ او تینٹ پارینے کہ پاکستان نا جلہو تیٹی مغربی بلوچستان ئٹی ارا بندغ آک خلنگانے ہرافتا خاہوت آک اسلام آباد برانز ئٹی ساڈی ءُ۔
بلوچ رہشون پارے کہ دا بے جواز ءُ پروپیگنڈا سے ہرا کٹ پتلی آ وزیر جان اچکزھی نا حواس باختگی ئے نشان تیک۔
او پارے کہ ہرا خاہوت آک برانز کننگو اوفتیان ہریفِنگ مرے کہ او دِنا آجوئی ئے خوارہ، گڑا دروغ و راستی چائنگ مریک۔
نُم چارے کہ پاکستان ہندا ہفتہ ٹی مغربی بلوچستان ئٹی باہوٹی آ بلوچ آتا جلہو کرے، ہراڈے بی این ایم نا بنجاہی کونسل نا باسک چیئرمین دوستا تیوعہ خاہوت توں شہید مس۔
چیرمین دوستا نا سالُم دوست محمد ئے 2012 ٹی پاکستانی لشکر بیگواہ کرینے، اونا خاہوت اونا بیگواہی آن پد پاکستانی لشکر نا کیہی کاروائی و زوراکی تان پد دے کہیلنگ بلوچستان ئٹی باہوٹی مسُر ہراڈے اوفتے نشانہ کننگا۔
بی وائی سی نا رہشون ڈاکٹر ماہ رنگ بلوچ دا تدینی نا بابت ئٹ ہیت کرسہ پارے کہ ہرافتے جلہو ئٹی ٹِک کننگانے او خاہوت نا بندغ آک اسلام آباد نا برانز ئٹی اوار ءُ “یعنی چئیرمین دوستا نا سالُم بیگواہ آ دوست محمد نا خاوت “دادے جان اچکزھی پین رنگ ئس تِننگ نا کوشست کرے۔
