ڈیرہ بگٹی: ضلع ڈیرہ بگٹی نا ضلعی انتظامیہ اسہ تھریٹ الرٹ نا اعلان کرینے، ہراٹی پاننگانے کہ بی آر اے و بی ایل ایف نا اواری ئٹ جلہو تا خُلیس ارے۔
اوفتا رد ئٹ بی آر اے نا بھلا کمانڈر آک اسہ اہم ءُ میٹنگ ئسیٹی فیصلہ کرینو کہ بی ایل ایف نا کُمک ئٹ ضلع ڈیرہ بگٹی ٹی مُسہ کیمپ اڈ تننگ مرو۔ داکان بیدس بی ایل ایف نا نیمہ غان بی آر اے ئے سلاہ و گولہ ہم تننگانے۔
تھریٹ الرٹ آن پد ضلع ٹی چیکنگ و سیکیورٹی سخت کننگانے و ہن و بر نا کسر تیا سخت نگرانی بناء کننگانے۔
یات مرے کہ اندا تو ئٹی 02 تاریخ آ بی آر اے و بی ایل ایف ضلع کچھی نا علاقہ سنی ٹی میسر شاہوانی نا ہند آ پاکستانی فوج ئنا قافلہ آ جلہو کریسُر۔ ہراٹی پنچ کارندہ خلنگا و اوفتا سلاہ و گولہ تے دوئی کننگاسس۔
