بی وائی سی نا نیمہ غان شنگ مروکا بیان ئٹی پاننگانے کہ تنظیم نا سربراہ تا برخلاف برجاء انگا کیس اسہ وارس پدا نشان تسُنے کہ ریاست نہ تنیا اختلاف رائے ئے توننگ کن قانود ئے سلاہ نا وڑ کارمرز کننگ ءِ بلکن عدالت ئے ہم مننگ افس۔
بیان ئٹی پاننگانے کہ ہنوکا دے جیل ئٹی مروکا سرسوج نا نیام ئٹی اسہ وارس پدا سی ٹی ڈی تیبہ چالان ئے عدالت ئٹی ہتنگ آ بے سہب مسُنے۔ کیس ئے چاننگ آن پد ہم چال ئٹ بھلن کننگ ءِ۔
بیان ئٹی پاننگانے کہ اول سی ٹی ڈی بی وائی سی نا سربراہ تا برخلاف دروغ ئنا ایف آئی آر کریسس۔ ریمانڈ نا نیام ئٹی ہم جج پاریسس کہ کُل کیس آک اسہ جاگہ غا مونا ہتنگ مریر۔ ولے داڑان پد سی ٹی ڈی 25 آن زیات دروغ ئنا کیس ہیسس۔ داسکان برجاء انگا سرسوج آتا نیام ئٹی سی ٹی ڈی دُنو پوسکنو چالان ئس مونا ہتنے کہ ہرا مُست مونا ہتنگ متنے۔ دا حالیت ئٹی نہ تنیا ریاستی ادارہ غاک قانود ئے سلاہ نا وڑ کارمرز کننگ ءُ بلکن عدالت نا اختیار ہم اثرمند مننگ افک۔
ترجمان ایسر ئٹ پارینے کہ بی وائی سی بندغی حق آتا تنظیم، وکیل و سول سوسائٹی آن خواست کیک کہ او قانود ئے غلط کارمرز کننگ و بندغی حق آتا باسک آتا برخلاف ریاستی زوراکی تیا پام ایتر و بی وائی سی نا سربراہ تا آجوئی کن تینا کڑد ئے ادا کیر۔
