بلوچستان لبریشن فرنٹ (بی ایل ایف) نا جارکش میجر گہرام بلوچ میڈیا ٹی شنگ کروک تینا بیان ئٹی پارینے کہ کوزہ گیر دشمن نا برخلاف کیچ ئنا علاقہ دشت، آواران، تربت، مند، کولواہ و پسنی ٹی سوگو آ کاروائی تیٹی دشمن ئے بھاز جانی و مالی نسخان تسونُن۔
جارکش ودیک پارے کہ بی ایل ایف نا سرمچارک تنظیم نا انٹیلیجنس ونگ ئنا حوال آ 5 نومبر 2025 نا شام 5:30 بجہ غا دشت، کیچ ئنا علاقہ کھڈان ئٹی پاکستانی فوج ئنا کارندہ غاتے ہمو وخت آ ٹک کریر ہرا وخت کہ اوفک گاڑی تیان تینا راشن و ایلو گڑاتے دھڑفنگ ئٹی اسُر۔ سرمچار آتا اِرا جتاؤ ٹولی دا جلہو ئے کریر۔ اولی ٹولی بھاز خڑک آن فوجی کارندہ غاتے ٹک کرے، ہرانا سوب آن مسہ کارندہ ہمو جاگہ غا کھسکر و اِرٹ ٹپی مسر وخت ئس کہ سرمچار آتا ایلو ٹولی فوجی کیمپ آ آر پی جی و ایلو بھلا سلاہ تیٹ گولہ باری و سُمکاری کرے و کیمپ آ خلوکا کیمرہ تے ہم ٹک کرِسہ نسخان تسُر۔
میجر گہرام مُستی پارے کہ سرسوب آ جلہو آن پد بی ایل ایف نا سرمچارک سرسوبی ئٹ پیشتمِسہ تینا ٹھکانہ غاتیا سر مسُر۔ واہم کوزہ گیر پاکستانی لشکر ہر وخت ئنا وڑ لس آبادی آ بھلا سلاہ تیٹ سُمکاری کرے۔
میجر گہرام بلوچ پارے کہ بی ایل ایف نا سرمچارک اسہ پین جلہو ئسیٹی 6 نومبر نا سوب ئنا 8:00 بجہ غا آواران نا خڑک ئنا علاقہ پیراندر (کنیرہ) ٹی اسہ سنگری او جلہو ئسے ٹی کوزہ گیر فوج ئے ہمو وخت ٹک کریر ہراوخت کہ فوجی کارندہ غاک کاروان نا رکھ ئکن پند آ چرینگ ئٹی اسُر۔ دا جلہو ئٹی سرمچارک مسہ کارندہ ئے خلکُر و اوفتا سلاہ تے دوئی کریر۔ وخت ئسکہ مسٹ ٹپی کریر۔
مسٹمی جلہو ئٹی 5 نومبر نا شام 5:00 بجہ نا خڑک سرمچارک کولواہ نا علاقہ جیرک ئٹی جوڑ مروک فوجی چوکی آ بھلا سلاہ تیٹ جلہو کریر۔ دا جلہو ئٹی آر پی جی نا کیہی گولہ فائر کننگا ہراکہ کیمپ ئنا تہٹی تمار ہراڑان دشمن ئے جانی و مالی نسخان مس۔
جارکش پارے کہ بلوچستان لبریشن فرنٹ نا سرمچارک 5 نومبر نا شام گوادر و پسنی نا بھلا کسر آ شتنگی نا ہند آ کسر ئے تفیر و اسنیپ چیکنگ کریر۔
مُسہ ساہت اسکان ناکہ بندی و اسنیپ چیکنگ نا وخت کوزہ گیر دشمن نا سہولت کاری نا شک ئٹی مشکوک لاری تا پٹ و پول نا عمل برجاء اسک کہ اسٹنٹ کمشنر پسنی تینا سرکاری کارندہ تیتون سر مس ہرادے سرمچارک دزگیر کریر۔ بی ایل ایف دزگیری آن پد پن کروکا سرکاری افسر آن سرسوج کننگ آن پد تنظیمی پالیسی و کمانڈ نا پاننگ آ بلوچیت و بندغی نا بنیات آ اسٹنٹ کمشنر ئے کارندہ تیتون اوار یلہ کننگا واہم اوفتا سرکاری سلاہ تے ہرفنگ مس۔ ہندا وخت اسہ بوزر لاری سے سرمچارک ہُشار۔
اسہ پین کاروائی سیٹی اینو 06 نومبر آ بی ایل ایف نا سرمچارک تربت نا علاقہ گھنہ ٹی کوزہ گیر پاکستانی لشکر نا چیک پوسٹ ئے دے ئنا دو بجہ نا خُڑک جلہو ئٹی ٹک کریر، دا کاروائی ٹی سرمچارک فوجی کیمپ آ اے ون گولہ نا کیہی راؤنڈ خلکُر ہرا کیمپ ئنا تہٹی تمار ہراڑان دشمن لشکر ئے جانی و مالی نسخان مس۔
ترجمان پارے کہ اینو پین اسہ کاروائی سیٹی 06 نومبر آ سوب ئنا 10:15 منٹ آ سرمچارک مند، کوہ ڈگار س گوبرد نا نیام دستچین نا ہند آ سیکیورٹی تروکا مورچہ ٹی ریموٹ کنٹرول بمب ئس تخار ہرا وخت دشمن کارندہ آک ہندا جاگہ غا سر مسُر گُڑا سرمچارک اوفتے ٹک کریر و اِرٹنگا کارندہ آک ہمو جاگہ غا کھسکُر۔ جلہو آن پد کوزہ گیر پاکستانی لشکر نا فضائی دستہ ہندا یند آ بس تینا خلنگ مروکا کارندہ تا جون تے مند سورو کیمپ آ درے و پدا جون تے تربت آ دننگا۔
ترجمان گہرام بلوچ پارے کہ بی ایل ایف دشت، آواران، مند، کولواہ، تربت و پسنی ٹی کروکا کاروائی تیٹی 08 فوجی کارندہ تے خلنگ، پنچ آن زیادہ فوجی تے ٹپی کننگ تون آواران و پسنی ٹی سرکاری سکاہ تے ہرفنگ نا ذمہ واری ئے ہرفک و دا قول ئے کیک کہ بلوچستان نا آجوئی اسکان کوزہ گیر لشکر نا برخلاف جلہو تا لڑ برجاء مرو۔
ترجمان ایسر ئٹ پارے کہ بی ایل ایف بلوچستان نا بھلا کسر تا ہنوکا ٹرانسپورٹ مالک تے خبڑدار کیک کہ کوزہ گیر لشکر ئے بلوچستان نا سرزمین آن مڈی تا دننگ ئٹی کُمک تننگ و سہولت کاری آن پہریز کیر اگہ نا تو او تینا جانی و مالی نسخان نا ذمہ وار تینٹ مرور۔
