شال ئٹی بی ایس او پجار و بی ایس او نا نیمہ غان پاکستانی لشکر نا دو آن خلنگ مروکا بی ایس او پجار نا مُسکوہی چیئرمین و بی این ایم نا باسک شہید چئیرمین زبیر بلوچ و شہید نثار بلوچ نا شہادت نا چِھلُمی دے آ اسہ دیوان ئس اڈ تننگانے۔
دا دیوان ئٹی جارچینی نا ذمہ وار اکرام بلوچ تون مسنے، دیوان شہید آتا یات ئٹ اِرا منٹ نا بے تواری تون کننگا۔
دیوان ئٹی بی ایس او پجار و بی ایس او نا مرکزی سربراہ و باسک آک شہید آتے دروت ندر کرینو و اوفتا زند و کردار آ تینا خیال آتے درشان کریر۔
اوفک ہیت کرسا پاریر کہ شہید چیئرمین زبیر بلوچ مدام راہبند آتا پاسداری کرسا پُر ایمن ءُ جہدکار ئس مسنے و لس بلوچ و خوانندہ تا رہشونی ئے کرینے۔ او تینا تیبہ زند ئے بلوچ آتا بنیاتی حق و انصاف نا جہد ئٹی تسُنے۔
اوفک پاریر کہ شہید زبیر بلوچ بیدس عدالت قتل، زور بیگواہی و ریاستی زوراکی تا برخلاف بے خوفی ئٹ توار بُڑز کرینے۔ او بلوچ خوانندہ تا سیاسی چائنداری نا سوگوی و مزاحمت کن بھلو کڑدار ئس ادا کرینے۔
دیوان ئٹی ہیت کرسا پاننگا کہ چیئرمین زبیر بلوچ ئے چم بازی ئٹ نشانہ کننگانے تانکہ بلوچ نا حق ئکن بُرز مروکا جُہد توننگ مرے۔ شہید زبیر بلوچ نا جہد و قربانی بلوچ قوم ئکن اسہ رہشونی نا کسر ئسے و زوراکی تا برخلاف مزاحمت ئے زندہ توننگ ءِ۔
اوفک ہیت کرسا پاریر کہ شہید نثار جان راج دوستی، اتحاد و انصاف کن جُہد ئٹی مسُنے کہ او تینا زند ئے بلوچ راج ئکن ندر کرینے۔ اونا جُہد و قربانی بلوچ خوانندہ سیاست ئٹی مُدام یات کننگ مرور۔
