زوراکی ئٹ بیگواہ کننگوک سلمان بلوچ نا بیگواہی ئے مُسہ سال پورو مننگ آ اونا خاہوت برانزی ریلی ئس کشنگ و سوشل میڈیا غا مہم ئسینا پڑو کرینے۔
خاہوت نا رد ئٹ 08 نومبر آ دے ئنا سئے بجہ غا شہید پروفیسر عبدالرزاق چوک خضدار آن برانزی ریلی ئس کشنگ مرو ہراٹی سیاسی و چاگڑدی باسک، خوانندہ، وکیل، حوالکار و لس شاریک اوار مریر۔ ریلی نا مسخت سلمان بلوچ تون اوار کُل بیگواہ کننگوک بندغ آتا آجوئی کن توار بُڑز کننگ ءِ۔
خاہوت نا پاننگ ءِ کہ سلمان بلوچ ئے 13 نومبر 2022 آ کوئٹہ غان زوراکی ئٹ بیگواہ کننگا و مُسہ سال گدرینگ آن پد ہم داسکان اونا بارو ئٹ ہچو حوال ئس اف۔ اوفک عدالت، کمیشن و حکومتی ادارہ تیا کیہی وار ہنانو ولے ہچو دیمروی ئس متنے۔
خاہوت خضدار نا کُل مخلوق آن خواست کرینے کہ اوفک برانز ئٹی اوار مریر و بندغی حق آتا لتاڑنگ نا برخلاف توار بُڑز کیر۔
خاہوت نا پاننگ ءِ کہ خضدار ئٹی برانزی ریلی تون اوار سوشل میڈیا پلیٹ فارم ایکس آ ہم اسہ آن لائن مہم ئس اڈ تننگ مرو۔
