بلوچ یکجہتی کمیٹی نا ترجمان شنگ کروکا تینا بیان ئٹ پارے کہ بلوچستان نا جتا جتا علاقہ تیان تعلقداری تخوک بلوچ سیاسی و بندغی حق آتا باسک آتے پاکستان نا پن ئنا انسدادِ دہشت گردی ایکٹ ئنا فوتھ شیڈول ئٹی اوار کننگ بلوچ اُلس ئنا جہد ئے طاقت نا زور ئٹ ایسر کننگ نا کوشست ئسے۔
ترجمان پارے کہ دا گامگیج آک نہ تنیا غیر قانودی ءُ بلکن اسہ خطرناک ءُ رجحان ئسینا عکاسی ئے کیک ہرانا ذریعت ئٹ پُر ایمن سیاسی کاریم تے توننگ، جائز اختلاف رائے ئے بے توار کننگ و بندغی حق، انصاف، سیاسی آجوئی نا توار ئے بُڑز کروک آتے ڈوہدار کننگ نا کوشست کننگ ءُ۔
او پارے کہ بی وائی سی نا باسک آتون اوار کیہی بلوچ سیاسی و بندغی حق آتا باسک آتا پنک بیدس شفاف کاروائی، قانودی ثبوت یا منصفانہ عدالتی عمل آن فورتھ شیڈول ئٹی اوار کننگانو۔ دا فہرست پین سیاسی باسک آتا پن تے اوار کننگ ءُ۔ درو نا دے تنیا بلوچستان نا علاقہ حب آن 64 بندغ نا پن دا فہرست ئٹی اوار کننگانے، ہرافتیٹی سیاسی و بندغی حق آتا باسک، خوانندہ و چاگڑدی باسک آک اوار ءُ۔
اونا پاننگ اسک کہ دا عمل آئینی و بنیاتی بندغ حق آتا برخلاف ءِ، انصاف نا حق، اظہار رائے، سیاسی مُچی نا آجوئی و ہن و بر نا آجوئی، ہرافتا ضمانت ئے جہانی بندغی حق آتا قانود آک تیرہ۔ انسدادِ دہشت گردی نا قانود ئے توننگ نا ہیلہ نا حساب ئٹ کارمرز کننگ ریاستی زوراکی نا بد انگا نشانی ءِ۔
او پارے کہ نن خواست کینہ کہ ریاست زوت سیاسی و بندغی حق آتا باسک آتون اوار کُل بندغ آتا پن تے فورتھ شیڈول آن مُر کے و جمہوری سیاسی جہد ئے توننگ و انسدادِ دہشت گردی نا قانود آتے سیاسی مسخت کن کارمرز کننگ نا لڑ بند مرے۔
