بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک تینا بیان ئسیٹی پارے کہ ننا سرمچارک 25 اکتوبر نا شام ئنا شش بجہ غا کیچ ئنا ہند ککن، تربت ئٹی کوزہ گیر پاکستانی لشکر نا چوکی آ راکٹ لانچر و بھلا سلاہ تیٹ جلہو کریر ہراڑان کوزہ گیر لشکر ئے جانی نسخان رسینگانے۔
ترجمان مُستی پارے کہ اسہ پین کاروائی سیٹی ننا سرمچارک 25 اکتوبر نا شام، تربت سنگانی سر ئٹی تنظیم نا انٹیلی جنس ونگ ئنا رپورٹ آ کاروائی کرسا ملٹری انٹیلیجنس نا بھلنی ٹی کاریم کروک ڈیتھ اسکواڈ نا کارندہ اکرم مراد زامرانی و اونا سنگت شئے مرید آ سُمکاری کریر، ہراڑان او اِرٹنگاک ہمو جاگہ آ خلنگار۔
او پارے کہ شئے مرید مُست سمیر سبزل گروپ نا باسک ئس مسنے ہرا ملٹری انٹیلیجنس نا بھلنی ٹی کیچ ئنا جتا جتا علاقہ تیٹ بلوچ ورنا تے شہید کننگ، برمتہ، دُزی و منشیات فروشی نا وڑ ءُ ڈوھ تیٹی اوار مسُنے۔ دا گروہ نا کارندہ آک 2020 ئٹی تربت نا علاقہ ڈنک ئٹی بلوچ شیرزال ملک ناز ئے شہید کریسُر۔
اونا پاننگ اسک کہ داسا زوت تمپ ئنا علاقہ نذر آباد ئٹی بلوچ زالبول آتا ریلی آ سُمکاری، کیہی ورنا تا شہیدی و زوراکی ئٹ بیگواہی ٹی ہم اکرم مراد و شئے مراد تُد اسُر۔ اوفتا میار تا بنیات آ تنظیم نا سرمچارک استو ٹک کرسا اوفتے خلکُر و سرکاری سلاہ تے ہم ہرفیر۔
ترجمان پارے کہ نن تربت ککن ئٹی کوزہ گیر پاکستانی لشکر نا چوکی آ بھلا سلاہ تیئٹ جلہو کننگ و تربت سنگانی سر ئٹی ڈیتھ اسکواڈ نا اِرا کارندہ ئے خلنگ نا ذمہ وادی ئے ہرفنہ و دا قول ئے کینہ کہ پاکستانی کوزہ گیر لشکر و اونا سلاہ بند پراکسی تے ٹِک کننگ نا کاروائی تے برجاء تخون۔
