پاکستان نا سپریم کورٹ حیات بلوچ نا خون ئٹ ڈوہدار پک مروک ایف سی کارندہ شادی اللہ نا مرگ ئنا سزا ئے عمر قید ئٹی بدل کرے۔
عدالت نا رد ئٹ کیس ئنا ثبوت آک اندن ءُ کہ رد کننگ مفسہ ولے نیت نا حوالہ ئٹ شک دائسکان ارے۔
پاکستانی حوالکار حامد میر چاگڑدی سائیٹ آ نوشتہ کرے کہ سپریم کورٹ حیات بلوچ نا خونی ایف سی کارندہ نا مرگ ئنا سزا ئے عمر قید ئٹی بدل کرے، ایف سی کارندہ بے ڈوہ آ حیات ئے زمین آ بٹیسا اونا پیر انگا لُمہ باوہ نا مونا ہشت سُم خلک۔
دا فیصلہ کیس ئنا پنچ سال آن پد مونا بس، ہرا 2020 ئٹی بلوچستان ئٹی سخت السی رد عمل ودی کریسس۔
13 اگست 2020 آ تربت نا علاقہ آبسر ئٹی دا تدینی مس ہراڑے کراچی یونیورسٹی نا خوانندہ حیات مرزا بلوچ تینا لُمہ باوہ تون مچھ ئنا باغ ئٹی اسک کہ اندا وخت ایف سی نا اُلاخ نا خُڑک تراک مس۔ تراک آن پد زوت ایف سی کارندہ غاک ایب ئہ کھیب ئنا بندغ آتے توریر۔
خن ئٹ خنوکا بندغ آتا رد ئٹ کارندہ غاک حیات بلوچ ئے زمین آ بٹیر، اونا دوتے تفیر، و اونا پیر انگا لُمہ باوہ نا مونا ہشت سُم خلیسہ اودے کھسفیر۔
تدینی نا جاگہ غا ساڑی آ بندغ آک پاریر کہ حیات نا لمہ باوہ وکارہ کریر کہ اوفتا مار بے میار ءِ ولے کارندہ سُمکاری ئے برجاء تخاسس۔
تدینی نا عکس و ویڈیوک سوشل میڈیا غا تالان مسُر، اوکان پد بلوچستان ئٹی سخت ڈکھ و خار ئنا درشانی کننگا، سوشل کیمپین جہانی تیبر آ ہم پام دوئی کرے۔
خون آن پد ایف سی تدینی ئے رد کرے ولے السی دباؤ آن پد شادی اللہ ئے دزگیر کننگا۔
تربت نا ڈسٹرکٹ اینڈ سیشنز کورٹ 20 جنوری 2021 ئٹی شادی اللہ ئے خون ئنا ڈوہ ئٹ مرگ ئنا سزا بنفنگا حیات نا خاہوت ئے جرمانہ تننگ نا حکم تس۔
ڈوہدار نا خواست آن پد بلوچستان ہائی کورٹ ئٹی کیس نوشتہ کننگا اوکان سپریم کورٹ آ سر مس۔ سپریم کورٹ مرگ ئنا سزا ئے عمر قید ئٹی بدل کرے۔
