بلوچستان نا علاقہ کولواہ و خاران آن اِرا بندغ پاکستانی لشکر زوراکی ئٹ بیگواہ کرے۔اندن ڈیرہ بگٹی آن چھاپہ آتا وخت پنچ بندغ زوراکی ئٹ بیگواہ کننگانے۔
حوال تا رد ئٹ درو کولواہ نا علاقہ آشال نا جہی رضائی ولد گزو ئے فرنٹیئر کور (ایف سی) بیگواہ کرینے ہراکان پد اونا ہچ ڈس اف۔
ایلو کنڈ آن خاران آن سی ٹی ڈی و ڈھکوک ادارہ غاتا کارندہ غاک اسہ لیویز کارندہ ئسے دزگیر کننگ آن پد بیگواہ کرینو۔
بیگواہ کننگوک لیویز کارندہ نا چائنداری بشیر احمد ولد محمد حسین کبدانی نا پن ئٹ مسنے۔
اندن ڈیرہ بگٹی نا علاقہ سوئی آن پاکستانی لشکر بگرا کالونی و بگٹی کالونی آ چھاپہ خلنگ نا وخت آ بندغ آتیا زوراکی کرسہ مُسہ بندغ ئے دزگیر کننگ آن پد بیگواہ کرینے ہرافتا چائنداری ابراہیم ولد رستم بگٹی، لاکرم ولد منشی بگٹی و نوردین ولد زُنو بگٹی نا پن تیٹ مسنُے۔
ہندا وڑ پاکستانی لشکر سوئی ٹی ہوٹل ئسے آ کاریم کروک یوسف ولد شیر محمد بگٹی ئے دزگیر کرسا بیگواہ کرینے و ڈیرہ بگٹی نا ہند سوئی بازار آن ماسٹر غوث بخش پنیئو بندغ ئسے ہم دزگیر کننگ آن پد بیگواہ کننگانے۔
