بلوچ وومن فورم نا بنجائی آرگنائزر ڈاکٹر شلی بلوچ نا پن ئے فورتھ شیڈول ئٹی اوار کننگ آن پد اودے تربت تھانہ ٹی پیشی ہلنگ مس، پیشی آن پد او میڈیا تون ہیت کرسا دا گامگیج ئے سیاسی کاریم تے نزور کننگ و بنیاتی آزاتی آ رکھ خلنگ پارے۔
ڈاکٹر شلی بلوچ پارے کہ انسداد دہشت گردی نا شِک آتے سیاسی کاریم تے توننگ کن کارمرز کننگ اوسوزناک و دا کاریم اظہار رائے و متاثر مروکا خاہوت آتون اوار مننگ ئے ہم نشانہ کننگ ءِ۔
مُستی ہیت کرسا ڈاکٹر شلی پارے کہ مُست ہم اونا برخلاف ایف آئی آر نوشتہ کننگاسس ہرادے او عدالت ئٹی چیلنج کریسس و داسا فورتھ شیڈول اونا برخلاف اسہ غیرقانودی چم ئسے۔
او پارے کہ حکومت اونا و اونا وڑ انگا ایلو باسک آتا ہن ئہ بر نا جاگہ تے تنک کرینے و داسا او تینا زمین آ چرینگ کن این او سی نا ضرورت ئے محسوس کننگ ءُ۔
او پارے کہ تڑی و اُراغا چھاپہ ئٹ خاہوت آتے فریشان کننگ ءُ و ہروخت اوفتے دزگیر مننگ نا خُلیس ارے واہم او پارے کہ قانود نا رس ئٹ تولسہ او تینا و ایلوفتا بنیاتی حق آتیکن توار بُڑز کرو و قانودی خواست آ تے پورو کرسا دا حالیت نا مقابلہ ئے کرور۔
