بلوچستان نا ضلع کیچ ئنا علاقہ مند ئٹی استو ننکان پاکستانی لشکر اُرا تیا چھاپہ خلکنے و مُسہ ورنا دزگیر کننگ آن پد زوراکی ئٹ بیگواہ کرینے۔
حوال تا رد ئٹ مند آن بیگواہ کننگوک آتیٹی ہارون ولد محمد جان، اونا ایلم محمود و فہد ولد حاجی عثمان اوار ءُ۔
خن ئٹ خنوک شاہد آتا رد ئٹ پن کروک ورناک اُراٹی خاچوک اسُر کہ ننکان سئے بجہ غا پاکستانی فوج چھاپہ خلک و اوفتے دزگیر کرسا نادُرستو جہہ ئس درے۔
