بلوچستان نا علاقہ اوتھل ئٹی پاکستانی فوج نا کنڈ آن بس آتے ہُرے اسکان پٹ ئہ پول کن توننگا۔ دا وخت آ اسہ ناجوڑو چُنا ئس، ہرادے علاج کن دننگ اسُر، کذیت کرے۔
خن ئٹ خنوک شاہد آتا رد ئٹ دا تدینی سئے شمبے و چھار شمبے نا نیامیکو نن مس، ہراتم بلوچستان آن کراچی آ ہنوکا کیہی بس آتے اوتھل چیک پوسٹ آ توننگا۔ کسری تا پاننگ ءِ کہ بس نَن ئنا سئے بجہ غا چیک پوسٹ آ سر مس ولے پاکستانی فوج اُلاخ آتے تورے و پٹ ئہ پول کرے۔
کسَری تا رد ئٹ بس ئٹی ساڑی اسہ چُنا ئسے نا تب سہب ئنا نائگُبان آ خراب مس، لُمہ باوہ نا کُمک نا خواست آتے فوج خف تورتو۔
کسری تا پاننگ ءِ کہ اگہ فوج بس ئے مونی ہننگ یا خُڑک ئنا اسپتال اسکان ہِننگ نا موکَل تسکہ گُڑا چُنا نا ساہ بچنگ کریکہ ولے چیکنگ نا پورو مننگ اسکان ہچو اُلاخ ئسے سُرِنگ کن التوس ہرانا سوب آن منہ ساہت آن پد چُنا دم تِس۔
پاننگک کہ اوتھل چیک پوسٹ آ ساندہ بس آتے اندن کیہی گھنٹہ اسکان توننگک، ہرانا سوب آن نہ بیرہ کسری تے سفر ئٹ ہڑاند مریک بلکہ بھاز وخت آ ناجوڑ آک وخت آ اسپتال ئے سر مفسہ۔ بندغ آک خواست کرینو کہ اگہ چیکنگ المی ءِ گُڑا دانا پین وڑ ئس مرے تاکہ بندغی ساہ تا نسخان مف۔
