نیدرلینڈز نا شار اوترخت ئٹی بلوچ نیشنل موومنٹ (بی این ایم) نا پارہ غان کوزہ مروک بلوچستان نا ضلع خضدار نا تحصیل زہری ٹی پاکستانی لشکر نا زوراکی، اُرا تیا چھاپہ و ڈرون جلہو تیٹی زالبول و چُنا تے شہید کننگ نا برخلاف برانز کننگا۔
برانز ئٹی بی این ایم و بندغی حق آتا باسک آک اوار مسُر۔ اوار مروک آک پلے کارڈ و بینر دوٹی ہرفیسُر ہرافتیا بلوچستان ئٹی فوجی کاروائی، زوراکی نا بیگواہی و بندغی حق آتا لتاڑ نا برخلاف نعرہ نوشتہ اسک۔
ہنوکا کیہی دے آن خضدار، زہری و ہیب کھیب ئنا علاقہ تیٹی پنجابی فوج ئنا کنڈ آن سخت کرفیو خننگانے و کیہی بندغ آتے زوراکی ئٹ بیگواہ کننگ مسُنے۔ اُرا تیا جلہو کرسا فوج بندغ آتے بیگواہ کرینے و لس شاری تا ہن ئہ بر آ رکھ خلنگانے۔ ہندا وخت میڈیا و انٹرنیٹ سروس ہم بند کننگانے، ہرانا سوب آن زیمی مروکا علاقہ تیان پکّو حوال ہلنگ متنے۔
برانز ئٹ بی این ایم نیدرلینڈز چیپٹر نا صدر مہیم عبدالرحیم، ڈاکٹر لطیف، کیا کریم، مہرہ بلوچ، محمد اقبال، خمیس، واحد بلوچ، جیے سندھ فریڈم موومنٹ نا باسک ستار ہیت کرسا پاریر کہ پنجابی فوج ئنا کاروائیک بلوچ اُلس ئنا برخلاف اشتماعی سزا نا دروشم ئس ہلکنو۔ اوفتا پاننگ اسک کہ زہری ٹی ڈرون جلہو تیٹی زالبول و چُناک شہید مسنو و کیہی بے ڈوہ شاری تے زوراکی ئٹ بیگواہ کننگانے۔
بلوچستان ئٹی کیہی وخت آن برجاء غا فوجی کاروائی تا سوب آن ہزار آتا کچ ئٹ خاہوت آک زیمی مسنو ولے جہانی ادارہ غاک دائسکان بے توار تماشائی ءُ۔ او پاریر کہ بلوچستان ئٹی بندغی حق آتا لتاڑ آ جہانی بے تواری پاکستان ئے پین حوصلہ تننگ ءِ، اگہ جہانی مخلوق زوت گامکیج ہرفتو گُڑا حالیت بھاز خراب مرو۔
برانزیک خواست کرسا پاریر کہ نن یو این، یورپی یونین، ایمنسٹی انٹرنیشنل و ایلو بندغی حق آتا تنظیم آتیان خواست کینہ کہ اوفک بلوچستان ئٹی برجاء غا ریاستی جبر، زوراکی نا بیگواہی، بیدس عدالت خون و شاری آبادی تیا جلہو تا آزاد پٹ ئہ پول کریفر۔
ہیت کروک آک جہانی میڈیا آن خواست کریر کہ اوفک بلوچستان نا حالیت آ میڈیا بلیک آؤٹ ئے پرغسا راستی ئے جہان نا مونا ہتیر تانکہ مظلوم آ بلوچ اُلس جہانی پِڑ آ بِننگ مرے۔
