بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک تینا درشان ئٹی پارینے کہ ننا سرمچار آک تنظیم نا ڈھکوک ونگ ئنا پاننگ آ 15 اکتوبر نا شام پاکستان نا وزارت داخلہ نا شیف کاریم کروک فیڈرل انویسٹیگیشن ایجنسی نا ارا لاری ئے کوئٹہ، تفتان ہائی وے آ بھلا سلاہ تیئٹ ٹک کریر ہرانا سوب آن لاری ٹی تولوک مسہ کارندہ ہموتم مرگ ئنا گواچی مسر و ارا کارندہ ٹپی مسر۔
ترجمان پارے کہ پاکستان نا ایلو ڈھکوک ایجنسی تا وڑ وفاقی تحقیقاتی ایجنسی بندغی اسمگلنگ ٹی اوار مننگ تون بلوچستان ئٹی راجی جنز ئتون تفوک بندغ آتا فون کال ٹریس کننگ ٹی ملٹری انٹیلیجنس و آئی ایس آئی نا کمک ئے کیک۔
او پارے کہ بلوچستان لبریشن فرنٹ مستونگ نا علاقہ کردگاپ ئٹی فیڈرل انویسٹیگیشن ایجنسی نا مسہ کارندہ ئے کھسفنگ و ارا کارندہ ئے ٹپی کننگ آن ذمہ واری ئے ہرفک، و دا عزم ئے کیک کہ بلوچستان ئٹی ریاستی فورسز اوفتا ڈھکوک ایجنٹ و ہمو کل بندغ آک ننا نشانہ غا مرور ہرا بلوچ الس ئے نسخان رسیفنگ یا اوفتا استحصال ئٹ اوار مرور۔
