بلوچ راجی آجوئی سنگر( براس) نا ترجمان بلوچ خان میڈیا ئے تروکا بیان ئٹی پارے کہ براس ئنا زیر کنٹرول خضدار نا ہند زہری ٹی کوزہ گیر پاکستانی لشکر زوراکی کن علاقہ ٹی مُستی بننگ نا کوشست کرے، ہراڑان سخت جھڑپ آتا بناء مس۔ جھڑپ آتیٹی کوزہ گیر لشکر نا کیہی کارندہ خلنگا و بلوچ راجی آجوئی سنگر( براس) نا شش سرمچار وطن نا رکھ ئٹی شہید مسُر۔
ترجمان پارے کہ شہید سنگت آتیٹ سنگت حافظ محمد عمر بلوچ و سنگت عبدالعزیز بلوچ 26 ستمبر آ و سنگت ثناء اللہ بلوچ، سنگت عبدالعزیز بلوچ، سنگت راشد احمد بلوچ و سنگت فیاض بلوچ 30 ستمبر آ شہید مسُر۔
ترجمان پارے کہ شہید سنگت حافظ محمد عمر بلوچ عرف جاناں ولد نوراللہ کوئٹہ نا ہندی ئس اسک، او اِرا سال مُست بی ایل اے تون اوار مس۔ حافظ عمر بلوچ خواننگ نا وخت آ سیاسی شعور ہلک و ریاستی زوراکی نا برخلاف مزاحمت نا کسر ئے ہرفے۔ پدا بی ایل اے ٹی اوار مرسا فوجی تربیت ہلک و کیہی کاروائی تیٹی سربراہی کرے۔ او تینا نظریاتی پختگی، تنظیمی نظم و ضبط و بے بےخوف مزاج نا سوب آن سنگت آتیٹی جتاءُ جاگہ ئس جوڑ کرے۔ اونا سوچ اسہ آجو، خودمختار و باوقار بلوچستان نا اڈ تننگ اسک ہراڑکن او تینا زند ئے قربان کرے۔
شہید سنگت عبدالعزیز بلوچ عرف کلیم اللہ ولد پیر محمد قلات کھڈی نا ہندی ئس اسک۔ او پنچ تو مُست بی ایل اے تون اوار مس۔ اونا فوجی سفر چُنک اسک ولے او تینا عمل ئٹ ثابت کرے کہ آجوئی نا جہد عمر یا تجربہ نا محتاج اف۔ کلیم اللہ تینا سنگت آتیٹی نرم گفتار، با اخلاق و پرعزم ورناس چائنگ مسکہ۔ و میدان جنگ ئٹی او دلیری، نظم و ضبط و غیر معمولی ثابت قدمی نا مثال جوڑ مس۔
شہید سنگت ثناء اللہ بلوچ عرف بٹے خان ولد پیر ولی بھٹار زہری نا ہندی ئس اسک۔ او چار سال مُست بی ایل اے ٹی اوار مس۔ کم وخت ئٹی تینا ذہانت، جذبہ و فوجی مہارت نا سوب آن بھلو مقام ئس ہلک۔ شاری گوریلہ سینا لحاظ ئٹ او دشمن نا ہن و بر نا ہُننگ، حوالکاری نا نیٹ ورک و زمینی دفاع ٹی بھلو کڑد ئس ادا کرے۔ تینا آخری دم اسکان وطن نا رکھ ئٹی دشمن نا دلیری ئٹ مقابلہ ئے کرسا شہید مس۔
شہید سنگت عبدالعزیز بلوچ عرف محمد ابراہیم ولد عبدالحکیم کھڈی قلات نا ہندی ئس اسک۔ او مزاحمتی سیاست نا باسک اسک ہرا بلوچ ورنا تیٹی سیاسی شعور و چائنداری ودی کننگ کن ڈھکوک تنظیمی کاریم کرے۔ پدا بی ایل اے ٹی اوار مننگ آن پد او فیلڈ آپریشن تیٹی بھلو کڑدار ئس ادا کرے۔ او نظم، صبر و نظریاتی مضبوطی نا چیدہ ئس چاننگ مسک، ہرا جہد ئے فکری بنیات ادا کرے۔
ترجمان پارے کہ شہید سنگت راشد احمد زہری عرف جمال خان ولد اشرف، نورگامہ زہری نا ہندی ئس اسک۔ 19 سال ئنا عمر ئٹی او آجوئی نا کسر ئے گچین کرے و مُسہ تو مُست بی ایل اے نا صف تیٹ اوار مس۔ چُنک سن مننگ آن پد ہم تینا شجاعت و عزم ئٹ دا ثابت کرے کہ آجوئی نا خواست ایمان نا نشانی ءِ۔
او پارے کہ شہید سنگت فیاض جتک عرف شاہویز ولد فضل جتک زہری نا ہندی ئس اسک۔ او ہندا سال جنوری ٹی بی ایل ایف تون اوار مس۔ او نظم، بے تواری و ثابت قدمی نا چیدہ اسک، ہرا محاذ آ ہر وخت ذمہ داری و قربانی نا مظاہرہ کرے۔ اونا یخین اسک کہ راجی آجوئی بیدس قربانی آن مننگ کپک، او ہندا یخین ئے تینا دتر ئٹ ثابت کرے۔
ترجمان پارے کہ زہری نا جنگ آک بلوچستان ئٹی برجاء انگا مزاحمتی تحریک نا ہمو لڑ ئنا بناءءِ ہرا کوزہ گیر ریاستی جبر آن پد ہم نزور متنے بلکہ ہر شہادت آن پد پین منظم، مضبوط و نظریاتی حساب ئٹ پختہ مسنے۔ زہری نا شہید آتا دتر بلوچ راجی آجوئی جہد ئنا اسہ پین دیمروی ئسے، ہرا دا تحریک ئے پوسکُن او نیمہ، پوسکن حوصلہ و پوسکن او تاریخ تننگ ءِ۔
او پارے کہ بلوچ راجی آجوئی سنگر( براس) دا وخت آ قول کیک کہ کُل اتحادی محاذ، بلوچ لبریشن آرمی، بلوچستان لبریشن فرنٹ، بلوچ ریپبلکن گارڈ و سندھودیش ریولوشنری آرمی ثانوی اختلاف تیان بُڑز مرسہ راجی آجوئی نا اسہ بیرک آ منظم مرور۔ براس اتحاد نا تنیا فوجی محاذ بلکہ سیاسی و تنظیمی سطح آ ہم بلوچ راج ئنا اسٹ مننگ نا چیدہ ءِ، ہرا دشمن نا کُل چم تیان پد ہم برجاء و ساڑی ءِ۔
