بلوچستان ئٹی سرکاری مخ تفی ٹی کاریم کروک ٹولی تا دو آن کوش آتا برخلاف شاری تا ریلی ئسے آ سمکاری کننگا۔
بلوچستان نا ضلع کیچ نا تحصیل تمل نا علاقہ نزر آباد ئٹی اینو شام بلوچ یکجہتی کمیٹی نا کنڈ آن اڈ تروک ریلی آ نا درست بندغ آک سمکاری کریر، تدینی ٹی ہچو جانی نسخان نا حوال بتنے۔
تنظیم تدینی ئے پک کرسہ پارینے کہ بی وائی سی تمپ نا کنڈ آن نزر آباد ئٹی اکمل صالح، عبداللہ مہم جان، و دیدگ داد رحمان نا سلاہ بند بندغ تا دو آن کوش ئنا برخلاف برانزی ریلی نا پڑو تننگاسس۔
ریلی ٹی شاری تا بھلو کچ ئس اوار مسک ہرافتیٹ زالبول و چناک ہم اوار اسر، برانزیک ریاستی مخ تفی ٹی کاریم کروک ٹولی تا کنڈ آن علاقہ ئٹی بھیم تالان مسنے و شاری تا کوش تا برخلاف نعرہ خلنگ مسنے۔
ریلی نا برانزی تا رد ئٹ ہراتم ریلی نا بناء مسک اِرا موٹر سئیکل آ سوار چھار بندغ خڑک بسر و ریلی آ سمکاری کریر ہرانا سوب آن برانزیک خوفزدہ مرسہ دانہ دانہ مسر۔
تمپ نا اسہ سرکاری کارندہ ئس بلوچ یکجہتی کمیٹی نا ریلی ئے سبوتاژ کننگ ئے پک کرسہ پارینے کہ ریلی ٹی زالبول و چناک اوار اسر، سلاہ بند بندغ آک پدا نرنگ ٹی سرسہب مسنو۔
یاتی مرے کہ بلوچستان نا جتا علاقہ تیٹ ریاستی ایجنسی و ایف سی تا زیر اثر کیہی پرائیویٹ ملیشیا متحرک او، ہرافتے جہی ڈیتھ اسکواڈ پاننگ مریک دا ٹولیک علاقہ تیٹ سیاسی باسک آتے ٹک کننگ و زوراکی ئٹ بیگواہ کننگ ئٹ اوار ءُ
ڈیتھ اسکواڈز بلوچستان ئٹی سیاسی و قوم پرست و اوفتا سیال آک جلہو تیٹ اوار مریرہ، چاگڑدی خرابی، اغوا برائے تاوان و ٹارگٹ کلنگ تا کیہی تدینی تیٹ ہندا ٹولیک کڑد ادا کننگ او۔
