گوربام تو او مش ئنا ٹُل آ سر مسر، اوفتان اسٹ مُر اسہ خلق ئسے دورگند کننگ بناء کرے ہراڑے بیرہ منَہ بُندر اسُر۔ دا خلق بلوچستان نا اِرا ضلع ئے جتا کروک مش تا لڑ ئنا نیام ئٹ اس ہراڑے بننگ کن گاڑی نا ہچ کسر الو۔ نیم کسر اسکان موٹر سئیکل نا کسر اس ولے اوکان مُستی اِرا ساہت (گھنٹہ) نا پندھ اس۔
دور گند ئے شیف کرسا ساوڑ تینا سنگت آن ہرّفے، “مُراد جان اندا خلق ءِ؟”
“ہئو اندا خلق ءِ۔” مُراد اودے ورندی تس۔
“ہچ خطرہ اف نہ داڑے ؟” ساوڑ دوارہ سوج کرے۔
“نہ نہ ہچو خُلیس نا ہیت ئس اف۔ دا کنا جند ئنا بندغ آک ءُ۔ دا دنو بندغ افس۔ خلقیئو بندغ ءُ مالدار ءُ بیرہ تینا مالداری تون کاریم تخرہ۔” او ساوڑ ئے اُست جم کرے۔
تومکا زرہ ئس اڈ کننگ آن پد مش ئنا ٹُل آن دھڑنگ بناء کریر، توفنک و ہمیل تون اوار ہڑتُما تِہ اسہ اسہ ڈبہ دیر ئنا ہم بڈ اسک ہرافتا زیہا پُچ خلوک اسک۔ ساوڑ ئے چھوٹ بینوک اسک و مُراد نا نت تیٹ بوٹ اس۔ اونا بوٹ آتان اسٹ کسری بننگ وخت آ کھشکاسس ہرادے و پھیش ئنا چھیلک ئسیٹ سوگو تفیسس تاکہ اودے گام خلنگ ئٹ ہڑاند مف۔
ایسکان او مش ئنا شیف آ سر مسُر دے ہم ٹک تس۔مش ئنا ماس آ، خلق آن مچٹ سِستہ اسہ چُنکو قبرستان ئس اسک۔ قبرستان نا رہان گدرینگِسہ مُراد نا گھامک سُست مسر۔ مراد قبرستان نا پارہ غا ہُرا۔۔۔ او تینا زند ئنا مہروان آ ہمسفر نا گُڈی جہہ ئے درست کریکہ۔۔۔ او اسہ وار تون دا اُستان درے کہ اودے سنگت ئس ہم تُد ءِ۔ او ہمو مہروان نا گُڈی جہہ ئے خوڑت ہُرا و مش ئنا بج آن پُھل آن بار پیشتموکا دے ئے ہُرا و ولدا اونا گُڈی جہہ آ خن تِہ ہڑسا۔ او ہُننگ خواہسکہ کہ اونا گُڈی جہہ آ تموکا دے ٹک امر خننگک۔
اونا اُست ئٹ ہمو احساس اسہ وار تو کاٹم ہرفے ہرا احساس اودے ہموتم مس ہراتم او اولی وار نازینک ئے خنا۔ سہب ئنا اولیکو دے ٹک ئنا روشنائی ہراتم اونا مون آ تما تو اونا مون اندن گروشک تننگ اس کس پارو کہ او اسہ لس بندغ ئس اف بلکہ اندا دے ٹک ئنا نور آن ودی مروکو اسہ روشنائی ئس ءِ۔
ہنوکا تم ئنا یات آک اونا مِلی ٹی تیرونک آن بار پِلشک تِننگ اسر۔۔۔ خاخر آن پلشک تروکا ہمو تیرونک اَرا خاخر نا تہان تیزی ئٹ بش مرسا نا گمان آ گُم مریک اندن کہ اونا ہچو وجود ئس مف۔
مُراد نا اُستا ہمو گُڈیکو یات بس، ہراتم او ہڑتُما گُڈیکو وار اسٹ ایلو ئے ہُرار۔ او ہمیل و توفنک بڈ آ سلوک اس و اونا سنگت خلق ئنا کماش ئسے آن رخصت کننگ اس۔ نازینک نا خن تیٹ اسہ سوج ئس اس و مُراد اونا سوج ئے پُہہ مننگ اس، نازینک نا خنک اوڑان سوج کننگ اسر، “مُراد ای ولدا نے اراتم خنوٹ۔” ولے مُراد خن تے اوڑان ہڑسا۔ اونا خن تا ہڑسنگ نا مسخت بیرہ اندا اس کہ او تینا مہروان آن مُر مننگ نا دا نزور آ پاس ئٹ، تینے نزور مننگ آن رکھے۔
اونا سنگت اونا بڈ آ دو ئے خلق، “سنگت گُڑا کان۔” مُراد ہچ پاتو و بشخندہ کرسا اوڑتون راہی مس۔۔۔ نازینک اوفتِہ ہُننگ اس ولے مُراد دوارہ اودے ہُرتو۔۔۔ او جھٹ ئسے ٹی نازینک نا خن تیان اودیم مس۔ اخس گڑا بدل مسس داخس وخت ئٹ۔۔۔ نازینک اینو گلزمین نا باہوٹ اس، مُراد اودے پاننگ کتوکہ کہ نازُل ای بسونُٹ، مگہ نی کنے خننگ خواہپیسہ؟
“انت مس۔۔۔ ہلہ زو کر سنگت چائندار و بلد نی اُس کنے مون ئٹ شاغانس تینٹ سلوک ارانگ خیال آتیٹ گُم اُس۔” ساوڑ اونا بڈ آ دو ئے خلِسہ اودے اونا خیال آتیان کشا۔
مُراد اسہ دم خیال آتان پیشتمِسہ ساوڑ ئے ہُرا، ولے ہچ پاتو و اوفک دوارہ خلق ئنا پارہ غا رادہ مسر۔ خلق ئنا منَہ نیاڑی اوفتِہ خنار تو اوفتا مونا پیشتمار۔ نیاڑیک مُراد ئے درست کریر، اوفتان اسٹ نا مون آ اسہ مہروانو بشخندہ ئس تالان مس۔ دا مُراد نا تاتہ اس، نازینک نا لمّہ و مُراد نا لمّہ نا چُنکا ایڑ۔ او مُراد ئے سر مرسا اوڑتون دو لخی مس، اونا تیدار آن دروت ہلک، اونا خن تیان خڑینک آک زرِسہ کلک آتیا بسر۔ او مُراد نا دو تے ہلِسہ اونا دو تیان دروت ہلک، مُراد اونا دو تیان دروت ہلِسہ بشخندہ کرے۔
مش تا دامن ئٹ ساڑی دا خلق ئٹ بیرہ چھار خاہوت اسر۔ اسٹ اسٹ آ خلق ئنا ایلو بندغ آک ہم مُچ مسر، غُٹ مُراد و اونا سنگت ئے بخیر کریر و اسہ بُندر ئسے نا مونا، دیمون آ پڑچھ ئس تالان کرسا توسر و اوفتِہ خوش آمدی کریر۔ ساوڑ کن دا غُٹ پوسکنو بندغ اسر، او دا علاقہ غا اولیکو وار بسس، ولے مُراد او کُل ئے چائسکہ۔
خلق ئنا بندغ آک اوفتِہ دیر تسر و چاہ کریر ہیسُر۔ کچاری ٹی تولوک اسہ کماش ئس اوفتِہ حوال کرے۔ حال حوال آن گڈ اسہ نیمہ وہیئو امبل ئس تینتو ورنا ئس ہمراہ کرے ہنا و مہمان تیکن ہیٹ ئس تھڑے۔ مُراد نا تاتہ لوہی ئے بیٹ کننگ کن بش مننگ اس کہ نیاڑی تیان اسٹ اودے تولفے و پارے، "ادی مُراد جان داخس سال آن پد بسنے نا خننگ کن نی توڷ نن لوہی تے کینہ۔” نیاڑیک بش مسر و جُھگی ئسیٹی ہنار۔ خلق ئنا کماش و مُراد نا تاتہ ہموڑے کچاری ٹی توسُر۔ مچٹ سِستہ چُناک گوازی کننگ اسُر و مُراد اوفتے غور ئٹ ہُننگ اس، اندن کہ اونا بھاز نہادیئو گڑاس گُم مسُنے ہرادے او پٹنگ ءِ۔ مراد نا تاتہ نا خن تیان خڑینک آک وہار، و چُنا تیان اسٹ ئے توار کرے، "ہانُل کنا گودی اندانگ بر۔”
ہراتم مُراد نازینک ئے الا ہنا تو اودے چُنا غا ہفتمیکو تُو اسک۔ ہانُل مراد نا مسڑ اس، اونا ودی مننگ آ مُراد داڑے الو و اولیکو وار او ہانُل ئے خنا او وخت آ نازینک کذیت کریسس و ہانُل لونڈینگاکہ۔ ہانُل نا ودی مننگ ئے چھل دے متویسس کہ اسہ دے نا گمان آ نازینک ناجوڑ مس۔ اودے تیبہ نن پھڈ ئنا خڷ بے جارات کرے، مَش ئنا دامن ئٹ نہ تو ڈاکٹر ئس اسک نئے کہ اسپتال و جانجوڑی نا آسراتی۔ ایلو دے خلق ئنا بھلاک سلہ کریر کہ نازینک ئے شار آ اسپتال ئسے آ دننگ مرے تاکہ اونا علاج مرے ولے او اوکان مُست ساہ تس۔ نازینک نا کذیت آن گڈ مُراد بیرہ اسہ وار دا خلق آ بسس۔
ہِننگ نا وختا اسہ نن نازینک اونا سینہ غا کاٹم ئے تخوک لیٹوک اس تو مُراد اونا کاٹم آ دو ئے تخِسہ پارے، "نازینک ای ولدا دیچا اراتم بروٹ، ننا ہانُل ودی مس نی اودے کنا بدل نا مہر آتے ہم ایتس۔ اودے انداخس مہر ایتس کہ اودے کنا وے مننگ نا احساس ہم مف۔” نازیک اونا ہیت آ مخِسہ پارے، "نے امر سما کہ ننے مسڑ ئس مرو و ای اونا پن ئے ہانُل تخوٹ؟ او مار ئس ہم مننگ کیک و ای اونا پن ئے مرید ہم تو تخنگ کیوہ؟ ڈیہہ ئنا مرید۔” مُراد بشخندہ کرے پارے، کنے سما ءِ مسڑ ئس مرو و نی اونا پن ئے ہانُل تخوس۔”
ہانُل رمبِسہ بس تاتہ ناز بی بی نا کُٹ ئٹ توس۔ تاتہ اونا کاٹُم آن دروت ہلِسہ پارے، "دادے چاسہ کنا ساہ، دا نا ابا ءِ۔” ہانُل مُراد ئے ہُرا و تاتہ ئے بغل کرے، و معصوم آ توار ئٹ مدا مدا اونا خف ئٹ پارے، ” ابا ہلہ ہنانے جنگ آ۔” مُراد اونا توار ئے بِنگ و اونا جوڑ تیا فخریئو اسہ بشخندہ ئس تالان مس، او ہانُل ئے توار کرِسہ پارے، "گودی نا ابا دیر تون جنگ کن ہنانے؟” ہانُل مون ئے ہڑسا و اونا توفنک نا پاسوئی ہُرا۔ تاتہ اودے مدا مدا کُٹ آن دھڑفِسہ مُراد نا پارہ غا رادہ کرے، او بس مُراد نا کُٹ ئٹ توس و اونا توفنک آ دو ئے تخا، "کنا ابا فوجی تتو جنگ کن ہنانے۔”
مُراد اونا کاٹم آن دروت ہلک، "انتئے فوجی تتو جنگ کیک۔”
ہانُل اونا پارہ غا ہُرا، "فوجیک ننے خلیرہ، ننا اُرا تے ہُشیرہ، لیلی ئے ہم خلکر، ننا ہیٹ تِہ ہم ہفیر دریر، کنا ائید ئنا پُچ آتِہ ہم ہُشار۔۔۔ لمّہ پائک کہ فوجیک بیرہ ننتو آخہ کُل ئتو اندن کیرہ۔” ہانُل منَہ تُو مُست تینا خلق ئٹ مروک لشکر کشی نا کسہ غاتے بناء کرے۔ "اندا خاطر آن ابا اوفتتو جنگ کیک اوفتِہ ننا ڈیہہ آن کشیک، گُڑا پین وختی او کس ئنا اُرا تے ہشوفس، کس ئے خلوفس، کس ئنا لیلی ہم کہوف، کس ئنا ائید ئنا پُچ آتِہ ہم ہشنگ کروفس۔”
مُراد وے پُہہ مننگ انداز ئٹ سوج کرے، "لیلی دیر ءِ؟”
ہانُل نا خنک غُل غُل کریر، "لیلی کنا دغو (دغر) اس۔ اودے فوجیک سُم ئس خلکُر، کنا لیلی کھسک۔”
مُراد اونا معصوم آ ہیت آتے بِننگ اس و ہمو دڑد ئے ہم خننگ اس ہرا اونا معصوم آ خن تیٹ قید مسس، ہمو دڑد ہراتم او تینا خلق ئنا بندغ آتِہ فوجی تا دو آن گِھر و پانچ مننگ آ خناسس، تینا دغو ئےسُم تا گواچی مننگ آ خناسس، ہراتم اونا ائید ئنا خوشیک و ارمانک اونا مونا ہُشنگاسُر، مُراد وس کرے ولے اونا جوڑ تیا بشخندہ بتو، اونا تیدار آ خار ئنا کرنچ آک پھاش مسُر، او تینا جوزہ غا تا شدت ئے ضبط کرے و ہانُل نا پمبہ انگا دو آن دروت ہلِسہ پارے "نن تینا ڈیہہ ئے آجو کرون، دا فوجی تے تینا ڈیہہ آن کشون گودی۔”
ہانُل نا خن تیٹ مہر ئنا استار ئس چلک تس، "نی ہم فوجی تتو جنگ کیسہ؟ نی کنا ابا ئے چاسہ؟ نی اودے خنانُس؟ "
مُراد اودے اندن مہر ئٹ ہُننگ اس کہ دا چُنکل آ پری نا خن تیٹ تینا باوہ کن اخس مہر ارے۔ دا چُنکل آ گودی تینا ناسرپندی ٹی ہم ظالم و ظلم آن نفرت نا احساس آن پُر ءِ، او حق و باطل نا چائند نا کنڈ آ گھام ہرفِسہ بننگ ءِ۔ ہانُل وختس سرپندی مس تو تاتہ ناز بی بی ئے تینا لمہ سرپند مسکہ، ولے ہراتم ایلو چُنا تا باوہ غاتے خناکہ تو تاتہ ناز بی بی آن سوج کریکہ کہ کنا باوہ ارادے؟ او ساندہ اودے اندا پاریکہ کہ نا باوہ فوجی تتو جنگ کن ہنانے۔ او اول پُہہ متوکہ کہ فوجی انتسے و باوہ انتئے اوفتتو جنگ کیک۔ ولے ہراتم اوفتا خلق آ لشکر کشی مس تو اونا معصوم آ ملی ٹی شعور نا اولیکو استار چلک تس، حق و باطل نا نیام ئٹ فرق ئنا اولیکو لیک ودی مس، او ساندہ تینا سن ئنا چُنا تتون گوازی نا وختا پاریکہ کنا باوہ کُل فوجی تے خلو ہرا ننا خلق ئے ہُشار، ننا خلق ئنا بندغ آتے خلکُر و ہفیر دریر، ہرا کنا لیلی ئے ہم خلکُر۔
مُراد اونا خن تیٹ ہُرِسہ پارے، "ای نا باوہ ئے خنتنوٹ گودی ولے کنے سما ءِ او اسہ دے نے آ برو۔ ہراتم ڈیہہ ئٹ آجوئی نا دے ٹِک ایتو۔” مُراد تینا اُست ئٹ دا سوچِسہ اوڑان تینا ٹیوار ئے ڈھکا کہ مننگ کیک اودے درست کننگ آن گُڈ ہانُل اودے انداڑے توننگ نا کوشست کے۔ او تینے و تینا مسڑ ئے دا نزور آ پاس ئنا چکاس ئٹ شاغنگ خواہتوکہ۔ تاتہ ناز بی بی ہم اوڑان ہچ سوج کتو کہ او تینا مسڑ آن تینا ٹیوار ئے انتئے ڈھکا۔ ساوڑ چُپ تولوک باوہ مسڑ نا کچاری ئے بِننگ اس۔
ساوڑ و مُراد خلق ئٹ بھاز اڈ کتور، دے کیہلنگ تون او پیشتمار و تینا وتاخ نا پارہ غا رادہ مسُر۔ خلق ئنا نرینہ غا تیان اسٹ ساوڑ نا ہرنگوکا بوٹ آتے ہلک و تینا نت ئنا چھوٹ آتے کشا اودے تِس۔ نیاڑی تیان اسٹ اسہ چنکو لوتھ ئسیٹی اوفتا سفر کن اوفتے زرہ ئس دانکو، گؤن و ڈڈُکی تس۔
ہانُل ہِننگ وخت آ مُراد ئے پاننگ خواہسکہ کہ کنا باوہ ئے خناس پاس تہ زو بریس، ای نے کن زہیر کرینُٹ۔ ولے سما اف معصوم آ چُنا نا شَک اس یا کہ قدرت دا باوہ مسڑ ئے اسہ نزورو پاس ئسے نا چکاس آن رکھنگ خواہسکہ، ہانُل ہچ ہیت کتو۔ ولے مُراد اینو اونا خن تیٹ دوارہ ہمو سوج ئے خننگ اس ہرا نازینک نا خن تیٹ اس، "ای نے دوارہ اراتم خنوٹ۔”
