کوئٹہ پریس کلب ئٹی غنی بلوچ نا خاہوت پریس کانفرنس کرسہ اونا آجوئی کن اسہ وار پدا کالخواہ و بندغی حق آتا ادارہ تیان زوت کاروائی نا خواست کرینے۔ خاہوت نا پاننگ اسک کہ غنی بلوچ 25 مئی 2025 آن زوراکی ئٹ بیگواہ ءِ و دائسکان اونا ہچو حوال ئس افک۔
خاہوت پارینے کہ غنی بلوچ نا بیگواہی ئے 142 دے گدرینگانے۔ ولے پولیس، کالخواہ و عدلیہ آن کس ئس داسکان دا پاتنے کہ او ارانگ ءِ و ارا حال ئٹ ءِ و دنا تحویل ئٹی ءِ۔ او پارینو کہ ” نن ہر آئینی کسر ئے ہُران، عدالت آتیا ہِنان، ولے ہچو ادارہ ئس پٹ ئہ پول ئے مونی دتنے “
پریس کانفرنس ئٹی پاننگا کہ خضدار ڈسٹرکٹ اینڈ سیشن کورٹ کیس ئے دا بنیاد آ خارج کرے کہ خاہوت زوراکی نا بیگواہی آ پٹ ئہ پول ئے ثابت کننگ کتو۔ خاہوت دا ہیت ئے رد کرسہ پارینے کہ پٹ ئہ پول کننگ زیمی خاہوت نا نہ بلکن ریاستی ادارہ تا کاریم ءِ۔ او پارے کہ ” نن تاریخ، جاگہ و ٹرانسپورٹ کمپنی نا کل ریکارڈ آتے جمع کرینُن۔ ولے پولیس نہ کمپنی آن معلومات ہلکنے نہ ہمو جاگہ یا کوچ ئنا کیمرہ فوٹیج خواہانے۔
خاہوت نا پاننگ اسک کہ غنی بلوچ نا بیگواہی نہ بیرہ اسہ خاہوت ئسے نا ذاتی ڈکھ ءِ بلکن آئین پاکستان نا پاش برخلافی ءِ۔ اونا رد ئٹ آئین ہر شاری نا زند و آجوئی نا حق ئنا ضمانت ئے ایتک۔ و بندغ ئسے دزگیر کننگ آن پد عدالت آ ہتنگ المی ءِ۔
خاہوت پین پارے کہ چھار تو آن زیات وخت گدرینگنگ آن پد ہم نہ غنی بلوچ ئے پیش کننگانے نہ پاننگ مسنے کہ او ارانگ ءِ۔ دا نہ بیرہ آئینی بلکن بندغی حق آتا برخلافی ءِ۔
او پاریر کہ عدلیہ، حکومت، بندغی حق تا ادارہ غاک و میڈیا آن خواست کینہ کہ او دا معاملہ غا توار بڑز کیر و غنی بلوچ نا آجوئی کن جوانو گارم ہرفِر۔ خاہوت پڑو کرینے کہ او تینا بندغ تا آجوئی اسکان بے توار مروفس۔
