افغان میڈیا نا رد ئٹ افغان حکومت پاکستان نا وزیر دفاع خواجہ آصف و آئی ایس آئی نا سربراہ لیفٹیننٹ جنرل عاصم ملک و ایلو پاکستانی جرنل آتا افغانستان آ بننگ نا خواست آتے رد کرے۔
افغان میڈیا نا رد ئٹ ہنوکا مُسہ دے آن اسلام آباد نا نیمہ غان مُسہ جتا جتا خواست رائی کننگا ہرافتے کابل رَد کرینے، واہم افغان وزارتِ خارجہ و حکومت نا نیمہ غان بیان شنگ کننگتنے۔
ہندا تُو ئٹی پاکستان و افغانستان نا تعلق آتیٹی خرابی بسُنے، پاکستان نا نیمہ غان ہندا دوبہ خلنگانے کہ طالبان حکومت ٹی ٹی پی ئے جاگہ ترِسا پاکستان نا برخلاف کارمرز کننگ ءِ۔ طالبان حکومت نا نیمہ غان دا دوبہ آتے رد کننگانے و ہندا پاننگانے کہ اوفک کس ئسے تینا زمین ئے پین ملک ئسینا برخلاف کارمرز کننگ نا اجازت تفسہ۔
دا تو ئٹی پاکستان نا نیمہ غان افغانستان نا پائتخت کابل تون اوار ایلو علاقہ تیٹی فضائی کاروائی کننگاسس، ہندا کاروائی تا جواب ئٹی افغانی لشکر سیمی ہند آتیئٹ پاکستانی لشکر آ جلہو کریسس، جلہو ئٹی پاکستانی فوج تینا جانی نسخان تا حوال ئے مناسس۔
پدا افغانی لشکر جنگ بندی نا پڑو کرسا پک کرے کہ جنگ بندی نا فیصلہ سعودی عرب، قطر و متحدہ عرب امارات نا خواست آ کننگانے۔
