نیویارک: اقوام متحدہ ئٹ فلسطین نا ویل ئنا زیہا مجلس ئس اڈ تننگا۔ مجلس ئٹ جتا ڈیہہ تا سروک آک اوار مسر و فلسطین ئے اسہ ریاست ئس منّینگ نا زیہا زور تسر۔
فرانس نا صدر ایمانوئل میخواں اقوام متحدہ ئٹ تران کرے و پڑو کرے کہ اوفتا حکومت فلسطینی ریاست ئے منّیک۔
دا وختا اونا پاننگ اسک کہ غزہ ٹی جنگ ئے بند کننگ و حماس نا کنڈ آن دزگیر کننگوک ایلو 48 اسرائیلی بندی تے آجو کننگ نا وخت بسنے۔
او پارے کہ بیرہ منہ گھام ئنا مُری ءِ اوکان گڈ جہان امن ئے توننگ کپک۔ اونا پاننگ اسک کہ نن داسا گیشتر گنار کننگ کپنہ۔
دا وخت آ اقوام متحدہ نا سیکریٹری جنرل پارے کہ فلسطینی تیکن اسہ ریاست ئسے نا مننگ اوفتیکن ٹیکی ئس اف بلکہ دا اوفتا حق ءِ۔
او پارے کہ دا ویل ئنا اسٹ انگا حل اندادے کہ اِرا آزادو ریاست اسٹ ایلو ئے منّیر و تومکا ریاست آک جہانی کہول نا بشخ جوڑ مریر۔
اندن سعودی عرب نا وزیر خارجہ فیصل بن فرحان آل سعود اقوام متحدہ نا مجلس ئٹ تینا راہشون محمد بن سلمان نا کنڈ آن تران کرے۔ او فلسطینی ریاست ئے منّینگ آ ایمانوئل میخواں نا تھورو ئے ہرفے و دا ہیت آ زور تس کہ دا خطہ ئٹ انصاف نا بنداو آ امن نا اسٹ انگا کسر اِرا ریاست نا جوڑ مننگ ءِ۔
فلسطینی صدر محمود عباس ئے نیویارک ئٹ مجلس ئٹ اوار مننگ کن ویزہ رسینگتو ہرا نا سوب آن او ویڈیو نا وسپہ ئٹ تران کرے و پارے کہ فلسطین ئٹ جنگ بند کننگ مرے۔
محمود عباس پارے کہ غزہ غا حکومت کننگ ئٹ حماس نا ہچو کڑد ئس مفرو، او حماس آن فلسطینی اتھارٹی نا مونا سلاہ بِٹنگ نا خواست کرے۔
