بلوچ لبریشن آرمی نا ترجمان جیئند بلوچ میڈیا ٹی شنگ کروک تینا بیان ئٹی پارینے کہ بی ایل اے نا سرمچارک زامران، قلات، خاران، شال و ڈھاڈر ئٹی ہفت جتاؤ جلہو کریر۔ دا جلہو تیٹی کوزہ گیر پاکستانی لشکر، ڈیتھ اسکواڈ و گیس دروک پائپ لائن ئے ٹک کننگا۔ ہمو وخت آ فوج ئنا کارندہ غا تتون اوار کیہی آسراتی تروک آتے دزگیر کننگا، ہرافتا سلاہ تے دوئی کننگا۔
ترجمان ودیک پارے کہ زامران نا علاقہ تنک ئٹی سرمچارک پاکستانی لشکر نا کیمپ ئٹ سلوک کارندہ ئس اسنائپر ئٹ ٹک کرِسہ خلکُر و جلہو ئٹی کارمرز مروکا فوج ئنا کواڈ کوپٹر ئے ہم خلکر بِٹیر۔
او پارے کہ 21 ستمبر آ ویگہ نا شال ئٹی شیخ زاہد اسپتال نا خڑک بنجاہی کسر ئے تفِنگ نا وخت آ پولیس کارندہ ئسے دزگیر کننگا و اونا سلاہ تے دوئی کرِسہ اودے آجو کننگا، ہمو نن ڈھاڈر ئٹی کمبڑی پُہل ئنا ہند آ گیس پائپ لائن ئے ترخوکا مواد ئٹ تباہ کننگا۔
او ودیک پارے کہ نوزدہ ستمبرآ سرمچارک خاران نا علاقہ برشونکی ٹی ڈیتھ اسکواڈ نا سرغنہ، حافظ ممتاز نا ٹھکانہ غا جلہو کریر، ہراکان اِرا ریاستی کمکار دزگیر کننگا۔ ٹھکانہ ٹی ساڑی سلاہ و ایلو گڑا تے دوئی کرِسہ ٹھکانہ ئے بُن تننگا۔ ہمو علاقہ ٹی سرمچارک لیویز چوکی آ کنٹرول دوئی کرِسہ لیویز کارندہ غا تے دزگیر کرِیر ہرافتہ پدا آجو کننگ مس۔
اندن اونا پاننگ اسک کہ ۱۸ ستمبر آ قلات نا علاقہ منگچر ئٹی فوجی تا کسر تے تفنگ نا وخت آ سرمچارک چغلی بمب ئٹ جلہو کریر، ہراٹی اسہ کارندہ ئس کھسک و مسٹ ٹپی مسُر۔ جلہو آن پد پاکستانی لشکر تینا مون سُمکاری کرے ہراڑان اسہ لس شاری ئس ٹپی مس۔
ترجمان مُستی پارے کہ بلوچ لبریشن آرمی نا سرمچارک قلات نا علاقہ زاوہ غان کوزہ گیر پاکستانی لشکر نا ایم آئی (ملٹری انٹیلی جنس) نا اسہ کارندہ ئس قیصرعباس فتنڈ، گجرانوالہ نا ہندی ئے دزگیر کریر۔ دزگیر کننگوک کارندہ تینا ڈوہ ئے منا ہراکان پد راجی عدالت اودے سزائے مرگ بنِفہ ہراڑا سرمچارک عمل کرِسہ اودے خلکُر۔
ترجمان جیئند بلوچ ایسر ئٹی پارے کہ بی ایل اے دا کُل کاروائی تا ذمہ واری تے رفک و تینا عزم ئے بھیر کیک کہ کوزہ گیر لشکر و اوڑتون کمک کروکاتے بروکا تم ئٹ پین ترندی ئٹ ٹک کننگو۔
